التشتت

                       

-هذاكر

-ياترى هناكل ايه إنهاردة؟!

بدأت تذاكر

- ياترى هعمل إيه في الدرس الذي أخذته إمبارح؟!

وإنت بتذاكر

-هخرج مع أصحابي إمتي ؟!!

-نسيت أقابل فلان عشان يشرحلي الفقرة الفلانية

وهكذا ….

حوار بين نفسك وعقلك أثناء المذاكرة خاصة

وهذا ما يسمى  << بالتشتت>>

التشتت

من أكثر الأشياء التي تسبب قلة تركيز كبيرة جداً وبالتالي إهدار كبير جداً في الوقت.

والتشتت يأتي لعدة أسباب

قد تكون

1- أسباب خارجية

(عدم توافر بيئة محيطة أثناء المذاكرة )

مثلاً

-تذاكر أمام التلفزيون أو ،بتذاكر في الصالة مع أخواتك ،وأسرتك ،أو تذاكر وأنت بتسمع موسيقى أو ،أغاني

-السوشيال ميديا

أنت ممكن وأنت قاعد على يوتيوب أو الفيس بوك أو ….أو…

بتتفرج على أكثر من فيديو وبدون تركيز كامل على أى موضوع منهم

ودا طبعاً هيسببلك تشتت دا غير إن انتقالك من موضوع إلى موضوع آخر يجعل تركيزك شبه معدوم وبعد مدة عقلك لا يرى أى معلومة من هذه المعلومات .

ما هو الحل ؟

1-لابد من توفير بيئة محيطة تساعدك على المذاكرة.

2- ابعد عن التلفزيون ،وسماع الأغاني .

3-اجلس في مكان هادئ.

بكدة تكون وفرت لعقلك الراحة ،وتقدر تستقبل المعلومات بتركيز ،وبطريقة أسرع

4-ابعد تماماً عن السوشيال ميديا

أنت كطالب ثانوية عامة هتفتح الفيس بوك أو... أو... تعمل إيه؟

هتتفرج على كام فيديو في مواضيع مختلفة هتشتت عقلك بجانب المذاكرة

افتح غرناطة مثلاً من فترة لفترة

لو أنت متابع مع مدرس من على اليوتيوب في شرح مادة معينة

فتابع المواقع ،والصفحات اللى ممكن  تنفعك في الوقت الحالي.

فقط لا غير

2- الأسباب الداخلية

-الأفكار التي تعترضك أثناء المذاكرة سواء كانت مشكلة عائلية ،أو موقف متعلق بقرار ،أو مشاكل مع أصدقائك ،أو تفكير في كمية المواد اللي عليك مذاكرتها ،أو أسرتك اللى مش بتسأل عليهم أو….أو ….أو .

-عمل أكثر من شئ في نفس الوقت بتقسيم تركيزك على أكثر من حاجة وبالتالي جودة عملك بتنزل بشكل كبير جداً .

3-الاستعجال في أى قرار هتاخده .

الحل؟

1-ابدأ مذاكرة لمدة زمنية مثلا 30 دقيقة ،وركز فيهم ،وخذ راحة ما بين 5 دقائق إلى 10دقائق

ومع كل فترة زود الوقت 35 دقيقة 40 دقيقة وهكذا

لحد ما يقل نسبة التشتت وعدم التركيز عندك

(المقاومة تقل مع الوقت)

بمعنى

لو فضلت أربع ساعات متواصلة تذاكر عقلك في الآخر هيقاوم ،ومش هيقدر يكمل

لكن لو أنت مرنت  نفسك على المذاكرة على فترات مع الوقت مقاومة عقلك هتقل ،وهيقل التشتت بنسبة كبيرة جداً

2- وأنت قاعد بتذاكر لازم يبقى معاك " Note"  كلما تعارضك فكرة خارجية ،أو افتكرت مشكلة ،أو أى شئ يشتت تفكيرك اكتبها في وقت الراحة

ابدأ في حل المشاكل اللى كتبتها واتخلص منها لو عودت نفسك لفترة كبيرة إن شاء الله  تركيزك هيعلى  بنسبة كبيرة جداً.

من صور التشتت أيضاً اللي بتقابلك في الوقت الحالي

-أروح لمدرس تاني في المادة الفلانية ولا لا ؟

-المدرس الفلاني أحسن من المدرس الفلاني.

- أو تروح لأكثر من مدرس في المادة الواحدة .

كونك لسة مش مستقر على مدرس دا من المشاكل اللى هتلاقيها بتقابلك أثناء مذاكرتك

يعني

لازم تواجهها ،وتتخلص منها قبل ما تكبر ،وتأثر عليك سلبيًا.

وأكثر من مدرس في مادة واحدة هيجعلك مشتت

لأنك هتكون في باب معين ،ومع مدرس تاني في باب تاني

هتشتت نفسك ومش هتلاقي وقت تذاكر فيها المادة اللى بتاخد فيها درسين أصلاً.

لو مادة مثلاً زى الرياضة وأنت حتى الآن لسة بتغير فيها مدرسين فدا من المشاكل الكبيرة التي لابد من التخلص منها الآن لأن الرياضة أكثر من فرع هتروح لمدرس هيكون شغال في التفاضل وأنت أخذته مع المدرس اللى سبته ،والثاني في الجبر هتيجي على آخر السنة  باب مذاكرة كتير جداً وباب متفتحش ،أو محلتش عليه كتير دا غير إن دا هيسبب إنك هتيجي في الآخر هتركز على المادة اللى واقعة منك ودا ممكن يأثر على باقي المواد ويخليك تقصر فيها .

لو أنت مع مدرس كمل معاه ،وتوكل على الله ،ولو أنت لسة مش مستقر متخرجش من شهر 10 إلا وأنت مستقر على مدرسين في جميع المواد .

بقلم:هند خالد