رساله لطالب ثانويه عامه

رسالة إلى صديقي الطالب

"وما زرع الله في قلبك رغبة الوصول إلى شيء ما إلا ويعلم أنك تستطيع الوصول إليه"

الإنسان بطبعه كائن كسول يحب الراحة ويميل إلى  حاجة متاحة له لكن الوضع مختلف من شخص لآخر حسب الفترة الزمنية اللى بيمر بيها في حياته وهل أنت الكسل دا مناسب ليك في الفترة دي ولا لا ؟

انا ممكن أخمن أيه الشعور اللى ممكن الشخص يحس بيه لما ياخد خطوة كبيرة أو يدخل في مغامرة ممكن يكون مستقبله متوقف عليها، هو طبيعي جدًا هيحس إن الموضوع صعب وتقيل وأنه مش هيقدر يكمل ولازم ينسحب قبل فوات الأوان و أن مع الوقت الوضع يزداد سوءًا وكثير من المشاعر السلبية اللي هتتسرب ليك عشان تحسسك أن مفيش أمل، بس هو فعلًا مفيش أمل؟.

اسمحلي أقولك حاجة مهمة جدًا وهي أن مفيش في الفترة دي في حياتك غير الأمل.

اسمحلي أفكرك أن كل شيء مقدر وله سبب ودخولك مرحلة الثانوية العامة برضه مقدر و له سبب ولو أنت مش قد الثانوية العامة أو مش هتحقق أي إنجاز زي ما أنت حاسس دلوقتي مكنتش هتبقى موجود دلوقتي في مكانك دا بتذاكر وبتتعب وبتجتهد عشان توصل لحاجة في خيالك ومحدش يعرف هتتحقق ولا لا غير ربنا.

تسمحلي نفكر سوا أنت المفروض تتصرف ازاي عشان تعدي الفترة دي بأمان؟

أولًا: نصيحتي الدائمة في كل فترة من فترات الثانوية العامة هي الهدوء، الهدوء سلاح قاتل لكل المشاكل الى هتقابلك الفترة دي أو غيرها في الثانوية العامة، وأنت هادئ هتعرف تفكر صح تتصرف صح تذاكر صح وتختار كل حاجة المفروض تختارها صح.

ثانيًا: الثقة، لازم تكون واثق في نفسك بنسبة تتخطى الـ 100%

طب دا هيحصل ازاي؟ هيحصل لما تكون بتعمل اللي عليك بالشكل المطلوب وتكون بترضي ربنا برضه بالشكل المطلوب أو بمعنى آخر يكون احساس الرضا مالي قلبك فتكون راضي عن نفسك وتصرفاتك وعن كل حاجه بتعملها ودي أحاسيس هتخليك واثق بشكل قوي من نفسك ودي حاجة تدعمك بشكل قوي.

لازم تكون واثق من اختياراتك سواء اختيارك للمدرسين أو اختيارك لأصحاب الفترة دي، لازم تكون واثق أن ربنا عمره ما هيضيع تعبك، لازم تكون واثق أن ربنا برضه مش هيديك أكثر من تعبك فلازم تبذل المجهود اللي يرضي ربنا ويريح ضميرك.

ثالثًا: متسمعش غير اللي تكون متأكد بنسبة 100% أنه عايز مصلحتك، مش قصدي أن هينصحك ناس مش عايزة مصلحتك بس هينصحك ناس مش مهتمة لأمرك، فالنصيحة بدل ما تفيدك ممكن تنقلب عليك وتسبب مشاكل أنت في غنى عنها.

أخيرًا: ولو لمرة في الأسبوع لازم يكون عندك حاجة بتعملها علي سبيل تخفيف الضغط عن نفسك وتخفيف الحمل وممكن تكون (رياضة مفضلة، فيلم، سفر).

نصيحة أخيرة في نهاية المقال، طول ما الابتسامة دائمًا على وشك هموم كتير هتتخفف عنك من غير ماتحس أنها بتزول وطول ما ثقتك بالله دائمًا عالية طول ما أنت هتفضل واثق في نفسك وواثق أنك هتحقق الحلم الغالي جدًا واللي مش هتعرف معنى تحقيق الحلم غير لما تقول بكل فخر انا كان نفسي في حاجة وحققتها، فعلًا شعور لا تصفه الكلمات.

بقلم: مصطفى الشهاوي