حاسس انى مش هحل اي حاجة انا نسيت كل اللى ذاكرته

الوقت ابتدي يضيق
والاحباطات ابتدت تزيد
والتوتر والقلق علي اشده في الوقت ده
هتلاقي تحذيرات من كل اللي حواليك علي شاكلة شد حيلك الامتحانات قربت راجعت كام مرة حليت كام امتحان حليت كام كتاب ماينفعش تدخل الامتحان وانت مش حالل الكتاب الفلاني لو جدع كدة حللي السؤال ده ؟!!.. ايه ده انت مش عارفه ! ده مهم جدااا وجه في 2008
انا حاسس اني مش هحل حاجة انا نسيت كل اللي ذاكرته وغيره وغيره من الاحباطات اللانهائية
 اثبت .... الكلمة تدخل من هنا تخرج من الناحية التانية ماتبذلش مجهود في التركيز في الكلام ده وفر المجهود ده للتركيز في حاجة مش فاهمها او مراجعة علي حاجة سريعة
 ابعد الفترة دي بالذات عن اي حاجة تشتت انتباهك
ابعد عن كل ما هو محبط مهما كان دي الفرصة الاخيرة وانت محتاجها اكتر من اي حد تاني ماتصدقش اللي يقولك لا انت خلاص مش هتلحق تراجع
 ماتصدقش اللي يقولك عشان تجيب %99 لازم تكون حليت الكتاب ده وراجعت مع المدرس ده
ماتصدقش االي يقولك عشان تبقي دكتور لازم تنام 3 ساعات 'تذاكر 20 ساعة"
 ارمي كل كلمة محبطة ورا ضهرك وحولها لحافز ليك... خليها تحدي عرفهم ان مش انت اللي يتقال له كدة ...
 بعلو صوتك قول محدش يقوللي مش هقدر مش هتأثر بكلام حد فيكوا انا عارف نفسي وعارف قدرتي وهوصل مهما كانت الظروف بيني وبينكم الايام وهثبتلكوا ان كل كلامكوا غلط
استني اليوم اللي تفتكر فيه تعبك ومعاناتك الفترة دي.. وقد ايه انت صبرت وكملت... قد ايه انت فرحان ان ربنا قوّاك وصبّرك وقدرك انك تعافر قد ايه انت ممتن لكل كلمة محبطة اتوجهتلك لأنها كلنت تحدي اكبر وحافز ليك انك تكمل الكلمة الجارحة بتسند مابتهدمش :­)
 الفحم اما بيتحط تحت ضغط كبير وحرارة كبيرة بيتحول لماس ... سيبهم يفرحوا باحباطهم عشان يتفاجئوا بالماسة اللي طلعت من تحت ايدهم كل ما اتضغطت دلوقتي كل ما تمنك يغلي قدام .. كمّل واستحمل كمّل دلوقتي مستقبلك مستني قرار منك ... كمّل هتقدر كمّل هتوصل كّمل وصدق حلمك كمّل وثق في ربك 
كمّل وبس ...