الخوف من الإنجليزي

اتغلب على خوفك من أي مادة تواجهك

خافت جدًا من الإنجليزي لكن نجحت فيه.

قصة النهاردة مختلفة شوية، القصة مش عن شخصية مشهورة، لكن عن شخصية عادية جدٱ؛ مرت بظروف وأحداث وهى فى ثانوية عامة، شخصية قصتها بتعملنا دروس كتير فعلٱ فى الحياة.

القصة عن بنت كانت بتعانى من صعوبة الإنجليزى وهى فى ثانوية عامة، من ناحية القواعد والترجمة وحل القطع.

البنت كانت طول عمرها من أول ما بدأت تدرس الانجليزية وهى عندها مشكلة فى نطق الكلمات والقواعد الخاصة باللغة كل اللى كانت متمكنة فيه حفظ الكلمات، ومع مرور الوقت ابتدت تتعامل مع المادة أنها حفظ كلمات، ومش بتهتم انها تفهم القواعد.

ومع مرور الوقت؛ دخلت ثانوى وهى عندها نفس المشكلة، مدرسها فى الوقت دا ساعدها كتير انها تفهم القواعد و تهتم بالمادة، على الرغم ان الاساس عندها غلط لكن لما الفرصة ظهرت قدامها انها تتعلم صح، ما اهملتش الفرصة و تمسكت بها.

صحيح تحصيلها فى السنتين "أولى وثانية ثانوى" كان ثابت ومش كويس، لكن هي كانت حاسه انها اتعلمت كتير من الفرصة دى، ودخلت ثانوية و الخوف كان مسيطر عليها من المادة بشكل كبير.

أول ما دخلت عانت جدٱ إنها تفهم تانى القواعد اللى كانت فهمتها، وللاسف رجعت تحفظها وتحفظ المادة بكل محتوياتها من قواعد، وقصة وكلمات وغيرها..

واستمر الوضع وكانت درجاتها فى الامتحانات الشهرية مش كويسة خالص، لكن هى كانت بتحاول وفى قرارة نفسها كانت مقتنعة انها تقدر تحصل أكتر بالمذاكرة، وتساعد نفسها بنفسها انها ترفع مستواها ولو حتى بشكل بسيط ويمكن مش ملحوظ.

ولحد فترة المراجعة تقريبا شهر ٤ اكتشفت انها مش عارفة تحل، والرعب والخوف سيطروا عليها لكن فضلت تحل اسئلة كتير جدٱ وتمرن نفسها كتير وتذاكر ولحد ما دخلت الامتحان وامتحنت وطلعت من الامتحان وهى واثقة  معه عملت المطلوب منها وفى النهاية جابت درجة عمرها ما كانت تتخيل انها تجيبها ورغم انها مش الدرجة النهائية، إلا انها حققت نجاح يكفي أن تفتخر بنفسها.

فى النهاية>> الظروف مش عائق لأحلامك بس حاول وكون دايما مؤمن بنفسك وبقدراتك.