الثقة بالنفس

ثق بنفسك هتوصل

الثقة بالنفس..

فاكر الموقف اللى حصل امبارح؟ ايه زعلان من نفسك وحاسس بالإحراج، وفاكر إن كل الناس بتبص عليك بنظرة انتقاص! وكذا موقف زى دة يعدى وحزنك يزيد وتتحول لشخص انطوائي بشكل كبير وثقتك بنفسك بقت في الارض .وحيد غريب عن اللى حواليك حتى أقربهم!

المواقف دى بتحصل لينا كلنا وبتأثر فينا لكن الغلط كل الغلط أنك تديها قيمة أكبر من اللى تستحقه .أنك تسيبها تتحكم في اللى جاى من حياتك ،بدل ما تسيبها تروح مع الماضي .

تخيل لو كان الموقف دة أوغيره عدى بسلام ،خدت منه خبرة تفيدك في اللى جاى وعقلك بقى أكتر قدرة على التحمل .هتلاقي ثقتك في نفسك بقت عالية . مش هيهمك نظرة الناس ،على العكس هيهمك تحسن نفسك في عين نفسك .ومن ناحية تانية لو سبت الموقف يأثر عليك بدرجة كبيرة هتتحول "لوحيد غريب عن اللى حواليك حتى أقربهم ،حتى نفسك" !

أنت كطالب ثانوية عامة بتعدى عليك مواقف كتير بتحس بانك فاشل ومش قادر تعمل حاجة مفيدة وانك حتى متستهلش

اللى انت فيه .. وفى مدرسين بيعاملوك بنفس النظرة بانك فاشل وان خطوتك هتفضل دايما أقصر من باب أوضتك ..

أولا لازم تفهم إن نظرة الناس ليك مستمدة من نظرتك لنفسك ،انت اللى بتديهم الفرصة انهم يشوفوك فاشل ..

فالتغيير بيبدأ منك" حتى يغيروا ما بأنفسهم "

ثانيا شايف عندك قصور في جزء معين حاول تحسن نفسك فيه ،ممكن تفشل في الاول لكن مع كل مرة بتنجح جزئيا وبتدى

لنفسك جرعة ثقة .أوعى تبطل محاولة . اتحدى نفسك ،قول هخلص الجزء دة انهاردة ايا كان اللى هيحصل .. كل مرة تكسب فيها التحدى كافئ نفسك . ولو مرة خسرت متكررهاش ،دة غيرك معندوش ربع اللى عندك ووصل لحلمه ،هو مش احسن منك ولا انت احسن .مجهودك اللى هيوصلك ،فابذل مجهود يليق بحلمك.

ثالثا المعظم عنده قصور في المذاكرة وإن معدش وقت وغيرى ذاكر المنهج كتير ودة بيملاك سلبية ملهاش حدود ..

اتخلص من كل الافكار السيئة وبدلها بطاقة ايجابية تفتحلك كل الابواب المقفولة  .. *الكلام مبيأكلش عيش لكن الكلام المناسب بيديك الطاقة انك تجيب العيش* .. خلى عندك جملة بتملاك بالنشاط كل ما تهمد تقرأها .. وقبل ما مفعولها يروح استغله وذاكر ،واعمل حاجة تحسسك بانك ليك لازمة على هذا الكون .

كل دة بيتلخص:

(أوعى تـنتقص من نفسك ولا تديها أكبر من حجمها ، متسمعش كلام الناس غير بعد ما تعديه على عـقلك وتصفيه  كويس وبعـدين خد اللى يفيدك وارمى الباقي ، أوعى تبطل محاولة ،دة كله هيبنى عندك ثقة بـالنفس وعزيمة متضيعهاش .. حافظ عليها وابنى شأنك المستقبلى من اللحظة دى)..