الرصيد المجاني

الرصيد المجاني، وازاي تستغله صح؟

ـ عمرك فكرت أن ممكن يكون عندك باقة دقايق زي باقة الموبايل، باقة بتديك 1440 دقيقة في اليوم تعمل فيهم الي أنت عاوزه و محدده لنفسك، استغلالك الصحيح للدقايق دي هو اللي هيميزك في حياتك، الباقة دي كلنا متساوين فيها بس مش كلنا عندنا الحكمة في إننا نستغلها صح.. وافتكر كويس إن كل الناس عندهم باقة فيها 1440 دقيقة في اليوم بس في واحد استغل الباقه صح فطلع لنا د/ أحمد زويل رحمة الله عليه، و واحد تاني استغلها غلط بس مطلعش لينا لأنه معملش شيء يخلده لا في حياته ولا حتي بعد وفاته..

• دلوقتي هل تحب تعرف ازاي تستغلها صح ؟

ـ قبل ما اقولك أنت ليه بتضيع دقايقك الي هي رصيدك المجاني، أنت في الأول محتاج تؤمن أن مفتاح، سر و شفرة النجاح والتميز هو إدارة واستغلال الوقت بشكل صحيح وبعدها تتوالي مسببات التميز.

• مبدئيًا كده: احنا بنضيع وقت ليه؟ 

1 )  بعدك عن الله وسوء علاقتك مع الله..

2 ) عدم إدراكك لأهمية الوقت في حياتك، فأنت لو مش مدرك قيمة الوقت هتدخل تلقائي في نقطة  "التأجيل" إنك تأجل كل عمل لبكرة، وفي الغالب بكره ده مابيجيش طول ما انت بتأجل..

3 ) عدم وجود خطة يومية تمشي عليها، عدم وجود هدف يومي محدده "يعني تصحى الصبح لا وجهة لك"..

4 ) الإكثار من النوم، أو بمعني تاني الهروب من المذاكرة بانك تنام كتير..

5 ) عدم الاحساس بالمسؤلية..

6 ) البيئة المحيطة من أهل وأصدقاء..

تحديد السبب أول خطوة عشان نقدر نحلها بإذن الله..

ولكن قبل إيجاد الحلول.. هل عندك فكرة تنظيم واستغلال الوقت هيفرق في حياتك ازاي؟

ـ لما تعمل خطة تمشي عليها بكره لو نفذت ربعها، نصها أو حتي كلها هتلاحظ بنفسك الآتي:

1 ـ أنجزت كل المذاكرة الي عندك وخلصت كل مهماتك بكفاءه عالية  "يعني ماعملتش الواجب علي سلم الدرس"  و هتخلصه بسرعة وبتركيز..

2 ـ هتلاقي عندك وقت فراغ أنت كنت غافل عنه لأنك ديما بتأجل حاجتك وبتتراكم عليك فبتموت بأيدك أوقات فراغك..

3 ـ بتسيطر علي يومك، بتخليه خاضع ليك وليس العكس، فتقدر تحقق حلمك وهدفك، هتخفف من الضغوط الي عليك، لو أي حاجه طرأت عليك "امتحان مفاجئ، واجب كنت ناسيه…" هتقدر وقتها تتعامل مع الطوارئ دي لأنك ببساطة سيطرت علي يومك وقدرت تطلع منه وقت فراغ..

وأخيرًا تنظيم الوقت هو أحسن شيء يخليك في حماس مستمر وطاقة متجددة لتنفيذ كل خططك اليومية..

• خليني افكرك " من أحسن فيما بقي من عمره لم يؤاخذ عما مضي من ذنبه ومن أساء فيما بقي من عمره آخذ بالاول و الآخر"

• ممكن حد يقولي "أنا والله عاوز أنظّم وقتي بس الي حواليا مش مساعدنّي"

ـ تسمحلي أقولك إن أسهل حاجة علي ابن ادم إنه يلوم الآخرين علي أي حاجة هو مش عارف يعملها.. يعني أنت انسان بالغ عاقل تقدر تحدد اللي ينفعك واللي يضرك والأهم إنك تقدر تقول "لا"..

"لا" لأي حد عاوز يستخدمك لصالح أهدافه و مصلحته بغض النظر عن مصلحتك أنت فين..

"لا" لشخص عاوز يضيعلك وقتك..

"لا" لشخص بيستخدمك كأداة و وسيلة عشان ينجح هو وأنت لا..

قول "لا" بإحترام ولباقة للي حواليك وهما مع الوقت هيتفهموا أسلوبك وطريقة حياتك وهيحترموها .. 

وافتكر "إنك صاحب الباقة مش الي حواليك" ، افتكر كمان "إذا لم تكن لك وجهة فلا يهمك أي الطرق تسلك"

ـ صدقني احنا مش بنظم وقتنا عشان نعيش ال 24 ساعة في شغل وضغوط بالعكس احنا  بننظمه عشان نقدر نستمتع بال 24 ساعة بدون ضغط وضيق، وكمان وقتها تقدر تتحقق جميع الجوانب الحياتية في يومك سواء الجانب الروحاني، الاجتماعي، المهني، إلى اخره.

عرفت أسباب تضيع وقتك خلاص.. دلوقتي محتاجين نعرف طريقة نراقب بها نفسنا عشان نبطل نضيع وقت وبعدها نقدر نستثمر وقتنا صح..

ـ هات ورقة وقلم و قسّم الـ 24 ساعة.. علي سبيل المثال 8 ساعات نوم، يتبقي لك 16 ساعة قسّم كل ساعة إلى 4 ارقام وكل قسم 15 دقيقة واكتب في كل ساعة المهمات اللي قمت بتفصيلها واكتب برضوا الحاجات الي ضيعت فيها وقتك اكتب تفاصيل التفاصيل متعديش دقيقة إلا لما تكتب كنت بتعمل فيها ايه وفي نهايه اليوم اشطب علي كل عمل قمت بيه ضيعلك وقتك، وحافظ إنك متكررهوش في اليوم الي بعده.. وإنك هتحافظ علي وقتك أكتر، التزم بالفكرة دى لمدة أسبوع كامل وقتها هتبطل أي حاجة ممكن تعطلك وهتعرف قيمة وقتك صح..

" الخــطـــة "

1 ) استعِن بالله وجدد نيتك قبل أي حاجة.

2 ) حدد وقت ثابت من كل يوم خليه مخصص لكتابة مخطط اليوم التالي.

3 ) ابدأ اكتب كل حاجة أنت محتاج تنفذها في خطة بكرة.

4 ) رتب أولوياتك الأهم فالمهم.

5 ) قسم وقت لكل مهمة عندك هتنجزها في قد ايه، وماتكونش مثال يعني متقوليش أنا هخلص المادة في ساعة وأنت من جواك عارف إنها محتاجة وقت أكتر.. راعي النقطة دي كويس عشان متحبطش نفسك.

6 ) ما تجدولش كل دقيقة في الخطة بتاعتك سيب وقت للطوارئ وحدّد وقت للراحة ووقت لأسرتك وصدقني هتلاقي.

7 ) بُص علي الخطة نظرة عامة واتخلص من أي حاجة أنت كتبتها وشايف إن مالهاش لازمة ومضيعة لوقتك وخلاص.

8 ) حافظ علي وجود خطتك دايمًا معاك وبُص فيها وراجع نفسك وشوف أنت وصلت لفين فيها.

9 ) التزم بالخطة قدر المستطاع وافتكر إن أول، تاني، تالت يوم ممكن متنفذهاش كاملة لكن من المؤكد إن استمرارك هيوصلك للتنفيذ الكامل بعدين علي أتم وجه.

• خطتك في جيبك، جدولك في راسك اللي يحاول يعطلك قطّعه =D 

ـ خلّي ده شعار المرحلة عشان تقدر تنقذ خططك وتوصل لهدفك..

ـ لكن خليني ألفت انتباهك لشيء، إن اليي عاوز يعطلك مش شرط يكون من البشر الي حواليك لا، في حاجات تانية زي "الموبايل، والانترنت، والتليفزيون" دول بياخدوا من وقتك كتير و كمان "التأجيل" ده أكبر عامل من عوامل تدمير الوقت والفشل؛ فحاربه..

• اللهم اعوذ بك من العجز والكسل.
• اللهم بارك لي في الوقت والجهد.

• وتذكر قول الله سبحانه وتعالي " وَأَنْ لَيْسَ لِلْإِنْسَانِ إِلَّا مَا سَعَى "

وأخيرًا:

• ابدأ بتنفيذ ما تعلمته، ابدأ الآن ولا تسوف.