أفلام وثانوية

اتكلمنا كتير عن ضرورة الراحة كل فترة عشان تقدر تكمل،

طيب أيه المانع لما ناخد وقت راحة ونستغل الوقت دا في شيء مفيد،

هقولك على أكثر٣ أفلام ممكن يفيدوك في المرحلة الحالية وهيكونوا ليهم أثر كبيرعلى تفكيرك اتجاه حاجات كتير، وهيسيبوا بصمة في حياتك.

1-the pursuit of happiness:

الفيلم بيتكلم عن قصة حقيقية لشخص عافر، وكافح لدرجة أنه وصل لمرحلة كان بيبات في الشارع والحمامات العامة والولد اللى معاه هو ابنه حقيقي،

لكن بعد رحلته الطويلة وكفاحه وصل في النهاية لمراده لأنه كان بيعافر، وبيصبر.

الفيلم عبقري، وتاريخي، وحلو جدًا.

(الفيلم ليس به مشاهد خارجة)

و ممكن تركز في الكلام كويس ومنه تطور اللغة عندك،

ودا جزء من الفيلم :

“Don't ever let someone tell you that you can't do something you got a dream you gotta protect it when people can't do something themselves they are going to tell you that you can't do it you want something go get it period”

2-3idiots:

فيلم من الأفلام اللى ممكن يُدرس في المدارس والجامعات، الفيلم بيوضح إنك مش لازم تمشي في الطريق اللى أهلك رسموه ليك،

و لازم تدرس الشيء اللى بتحبه، الشيء اللى تبدع فيه،

اسأل نفسك !

ايه مثلًا اللى هضيفه لما ادخل هندسة، أو ادخل تجارة، أو ادخل علم نفس، أو طب، أو لغات، أو ...أو..

هل هضيف حاجة ولا لأ هل هتنفع بعلمك دا غيرك ولا لأ ؟

هل هتبقى من الناس اللي لما تتسأل درست اللى حبيته وأبدعت فيه هتقول نعم ؟

وإبداعك هيظهر ولا هتكون مجرد واحد دخل كلية، واشتغل، وخلاص ؟

هل هتبقى من الناس اللى هتقول أنا عشت حياتي في مكان مش بحبه، وبروح كل يوم مكان أنا مش عايز أكون فيه، وبقابل ناس مش عايز أقابلها، وتندم على عمرك كله اللى راح هباءًا.

لازم يكون عندك طاقة تدافع عن حلمك الناس اللي حواليك اللي بيحددوا مستقبلك هيمشوا، وهيسبوك في يوم من الأيام وهيتبقي أنت وتقول ياريتني ما سمعت كلامهم.

عمرك ما هتلاقي إنسان مبدع، ومتقن في عمله، وعبقري في علم  مش هدفه، أو مش بيحبه،

عارف حتى لو فضل مثلًا ١٢ أو ١٣ساعة يذاكر وهو تعبان، ألم تعبه دا هيبقي ألم لذيذ لأنه مش كاره دا .

الفيلم هيخليك تعيد النظر في قرارات كتيرة جدًا في حياتك،

ودا أفضل وقت، ومرحلة تقدر تتفرج فيها على الفيلم دا.

الفيلم للأسف فيه مقاطع خارجة مش كتيرة وليست ذات أهمية فلما تلاقي  مقطع خارج متتفرجش عليه، أو جَري الفيديو.

<<اللهم بلغت اللهم فاشهد >>

أنا حذرتك متبقاش نيتك أنك بتتفرج على حاجة تصححلك أفكارك، وتاخد فيها راحة علشان تقدر تكمل وأنت تضيع دا بأي مشهد خارج، وهكذا الموسيقي.

3-فيلم الطفل إيشان:

الفيلم دا من الأفلام المؤثرة جدا بالنسبة ليا،

حسيت فعلاً إن مجرد ما الأهل يغصبوا عليك شيء لا هو هدفك، ولا هو شيء أنت بتحبه، كده هما بيقتلوا الطفل، وبيقتلوا أفكاره، وطموحاته .

أو إنك تفكر تدخل مكان علشان مثلاً تبقى مشهور، أو هو أعلى حاجة، أو علشان الناس عايزة كده وأنت عارف أن الشيء دا مش هدفك، ولا طموحك فأنت كدة دمرت حياتك، ومستقبلك بنفسك.

الفيلم أيضًا بيوضح أن المدرس ليه دور كبير جدًا بعد الأهل.

فيلم لازم يتفرج عليه المدرسين، وأولياء الأمور قبل الطلاب.

هتتفرج على الأفلام دي امتي؟

ممكن كل شهر فيلم واحد،

أو ممكن الترم دا فيلم ويفضل أول واحد،

وفي نص السنة على شهر ١٢ مثلًا  تتفرج على الطفل إيشان،

وأول ٢ مثلًا اتفرج على 3idiots.

الأفلام دي لو متفرجتش عليها دلوقتي واتفرجت عليها بعد أما تخلص هتقول ياريتني كنت اتفرجت عليهم في تالتة ثانوي-

وبكدة إن شاء الله تكون أخدت وقت الراحة بتاعك، وفي نفس الوقت استفدت كتير وغيرت أفكارك عن حاجات كتير في الوقت المناسب.

"بالتوفيق"

بقلم: هند خالد