عشوائيات وسط زحمة الثانوية العامة

وسط الزحمة و الانشغال و رتم الوقت السريع اللى شغّالين بيه دلوقتى ، حاجات صغيرة بتضيع من أغلبنا فى النص .. حاجات روتينية ممكن نكون مش واخدين بالنا من أهميتها اساساً ! .. لكن الحقيقة ان الشيطان يكمن فى التفاصيل  .. وان الحاجات الصغيرة دى عن تجربة بتفرق ، عشان كدة خلينا نسلط الضوء عليهم هنا .

1- الأكل

اه والله قريت صح :D
.. طاقتك الجسدية اللى بتبذل بيها المجهود فى المذاكرة بتعتمد على الاكل بشكل اساسى . لو مثلاً انت من النوع اللى مش بيعرف ياكل حاجة الصبح  دة غلط جداً جداً ،  اشرب كوباية لبن  حتى .. و ماتخلّوش الانشغال ينسيكوا وجبات الاكل على مدار اليوم .. و دة لأن انت ممكن ماتحسش بطاقتك دى وهى بتنزل ، لكن الفرق هيبقى فى التحصيل و انت بتذاكر .. و تكون انت مش متخيّل ان هوَ دة السبب !

2- النوم

لسة برده مستمرين فى الكلام على الطاقة الجسدية ..

احنا اه مشغولين .. واه ورانا مذاكرة لازم تخلص ، لكن لو تعبان و مش مصحصح هتاخد فى الحاجة 4 ساعات بدل ساعة بلا مبالغة ! .. عدد الساعات الكافى لراحة الجسم بيختلف من شخص للتانى واكيد كل واحد عارف اللى يناسبه ، خدوا كفايتكو عشان النشاط مهم .. ومحتاجينه جداً

و هنا برده هنتكلم عن حبيب الملايين  .. "النيسكافيه" و شركاه  .. النيسكافبه مش بديل ابداً عن النوم ، و كل ما بتتعود عليه كل ما هتلاقيه مابيأثرش معاك كأنك شربت ماية ! بالاضافة طبعاً لضرره عليك لما بيتشرب كتير ..

3-التشتيت

مهم جداً فى الفترة دى ان دماغك تبقى مركِّزة فى مذاكرتك و عينك على هدفك ، أولاً : كل ما يُمكن الاستغناء عنه سيبه .. لو بتاخد درسين فى مادة حاول تستغنى عن واحد و الوقت دة انتَ اولى بيه ..

ثانياً : بلاش كلام كتير الفترة دى .. و هنا تحديداً قصدى الأصحاب

من الجميل تشجَّعوا بعض لو تقدروا ، لكن كل الكلام السلبى و التخويف من الامتحانات لازم يتقطع بينكم تماماً .. ماتلعبوش بأعصاب بعض حتى لو مش قصدكو تعملوا دة

4- النية

و دى حاجة مهمة و منسية أغلب الوقت ..

مهم تستحضر النيّة وانت بتذاكر ..

بتذاكر ليه ..؟

عشان دة واجب العمر اللى انتَ فيه دلوقتى ..؟ عشان طلب العلم فريضة ..؟ عشان "انما يخشى الله من عباده العلماء" ..؟ عشان تكون خليفة ربنا فى أرضه ..؟ عشان تجيب مجموع عالى وتفرَّح أهلك بيك ..؟ عشان تكون في مكان كويس بعد كدة وتبقى قدوة حسنة للى بيقلِّدك ..؟ عشان تكون شخص متميز فى المستقبل و دة مش هيبدأ الا لما تخلَّص المرحلة دى ..؟ عشان تفيد غيرك وتعلِّمه بعد كدة .. ؟ عشان غيرك كان نفسه يبقى مكانك لكن ماعندهوش فلوس يتعلِّم .. ؟ عشان لما تتسأل عن "شبابك فيما أبليته" تجاوب ..؟ عشان تكتسب علم وخبرة .. ؟ .. الخ الخ ..

استحضار النيّة هدفه الأكبر التأثير النفسي ، ومش بس هتاخد دفعة معنوية كبيرة .. دة كمان هتكون بتاخد ثواب على كل كلمة بتقراها لأنها بتندرِج تحت النية دى ^^