التأثير المتسلسل: منظور دراسى جديد

هذا المقال التالى غير محايد ، غير موضوعى ، وأى تشابُه بينه وبين الواقع هوَ عبارة عن ذكرى هتسترجعها فى وقت من الأوقات و تكتشف ان الكلام كان صح  و ان كان ادراكه صعب عليك دلوقتى ..

تسمع عن "تأثير الفراشة" ؟؟ ..

دة بكل بساطة واختصار شديدين ، مصطلح بيعبَّر عن التأثير المتسلسل اللى ممكن يحصل فى نظام ديناميكي متحرِّك .. بمعنى حاجة صغيرة جداً هتؤدى لحاجة تانية اكبر منها شوية ، والحاجة التانية دى تؤدى لحاجة تالتة .. وهكذا .. لحد ما الناتج النهائى يكون شىء كبير جداً ومؤثِّر جداً ، لدرجة ان عمرك ما تتخيَّل انه كان بسبب الحاجة الصغيرة اللى بدأنا بيها فى الاول خالص !

-- -- --

يمكن من أكبر المشاكل اللى بتواجه أى طالب فى أى مرحلة دراسية و بتكون أزيد عند الثانوية العامة هىَ فكرة المذاكرة لأجل المذاكرة نفسها .. احنا بنذاكر عشان فيه امتحان ، والامتحان دة عايزين نِلم فيه درجات ، والدرجات دى هتعملنا مجموع كبير ، والمجموع دة هندخل بيه كلية كذا ... وبعدين لما هندخل الكلية هنذاكر عشان فى امتحان ، والامتحان عايزين نلِم فيه درجات .. و هكذا و هكذا !

دة المنظور التقليدي للدراسة ، و هو بالمناسبة منظور ماحدش يقدر يلومك عليه نهائى .. احنا قدام واقع ان تعليمنا بيؤصِّل المنظور دة .. وأى حد لازم هيمر بيه على الأقل فى مراحله الدراسية الأولى ..

انما المشكلة مش فى المنظور ذاته على قد ما هى فى نتايجه .. الموضوع بيتحوِّل لسباق و طاحونة بتلف فيها عشان تجيب درجات !

و الحقيقة ان دة شىء ممل جداً .. و انه من اهم أسباب فترات الروتين والرتابة اللى ساعات بتطوّل مع بعضنا و بيكون مؤشر الهمة والارادة فيها فى اسفل سافلين ..

-- -- --

فكرة ان ممكن حاجة تذاكرها دلوقتى كـ سطر فى كتاب الأحياء ، و يتبنى عليها معلومات أكبر و أكثر كثافة فى المستقبل .. وتبقى سبب فى يوم من الأيام انك تنقذ حياة مريض ..

أو حاجة فى الكيميا كان المُدرِّس محفظهالك بطريقة سهلة ، دخلت كلية و الحاجة دى اتكررت تانى ودرستها بشكل اوسع شوية بس مالحقتش تذاكرها كويس .. ولما دخلت الامتحان حلّيت السؤال اللى كان عليها بفهمك الأولانى بتاع زمان ، وكان السؤال سبب نجاحك فى المادة ..

أو الرياضة اللى زهقت من كتر حل التمارين اللى بتاخد وقت طويل ، بس لازم تحلّها عشان المدرس قال كدة .. و بعد ما دخلت كلية بقيت من أسرع الطلبة اللى بتحل بسبب انك متعوّد ، و حساباتك كانت سبب فى اقامة برج أو عمارة كبيرة بعدها ..

كل الافكار دى تبان خيالية !.. يعنى للدرجة دى الموضوع مُعقَّد ومُتشابك ؟

الحقيقة انه الدراسة من المنظور دة مخيفة جداً .. ومثيرة وحماسية جداً برده !

فكرة ان كل خطوة بتاخُدها دلوقتى هتؤدى لخطوة تانية أكبر فـ أكبر فـ أكبر ، هتخلّيك تاخد الخطوة الاولى دى وانتَ مدرك انها مهمة .. وبالتالى بقيت حاطط قُدامك غاية

هيخليك تذاكر كـ "علم" مش للمذاكرة ذاتها ، وحتى لو مش مؤمن بأهمية اللى بتدرسه .. هتبقى عارف انه مدخل للعلم دة فى المستقبل

استحضار الموضوع دة قدامك هوَ فى حد ذاته استحضار لنية طلب العلم اللى هوَ فريضة أصلاً ، و اللى على اساسه تم استخلاف آدم فى الأرض وانت من بعده .. و "هل يستوى الذين يعلمون والذين لا يعلمون" ؟