دماغ مهندسين .. أنا مختلف

بتستهويني جدا طريقة تفكير معينة وعقلية معينة يطلق عليها الناس عادة "دماغ مهندسين "
عادة الناس دي ترميهم في مشكلة يحلوها
بس كدة
بمنتهي البساطة
ليه يبقي في قدامي حاجة موقفاني؟
طالما مشكلة يبقي ليها حل
مفيش مشكلة بتفضل طول العمر… اكيد هيجيلها يوم وهتتحل … بس مش هتحل نفسها
عادة بيفكروا بعقلهم … مفيش حاجة اسمها حاسس
مش بالسينس هي
دايما بياخدوا بالمعطيات
كل حاجة بيحسبوها بالظبط عشان تطلع النتيجه مظبوطة
اكتشفت ان مش كل المهندسين كدة
ومش كل المش مهندسين مش كدة
لما حاولت اقارن بين طريقة تفكيري وتفكيرهم لقيت اختلاف كبير
لقيت اني بتعب في حياتي وفي مواجهة مشاكلي اكتر
هما كمان بيتعبوا … بس مش بيبينوا
خليك برنس :-D
كبر دماغك …. استبعد كل فعل ورد فعل وتصرف وتفاعل طالما مالوش لزمة
طالما هيضرك
بطل تقول كلمة حاسس
في حاجات المشاعر مالهاش مكان فيها
1+1=2
خلصت خلاص
انا طالب … عندي مشكلة …. ادور علي حلها وانفذه
بس كدة
هتعب؟!
اه هتعب
بس تعب عن تعب يفرق
وكل تعب وله نتيجة
اسعي للنتيجة
طول مانت باصص للنتيجة …. هتدوس علي اي عائق ادامك
النتيجة هتشدك
بنزهق من مشاكلنا …. وبنزهق اكتر من كتر ما بنسمع حلها
حفظناه
بس مافكرناش مرة ننفذه
بنستصعبه
بنحسه تقيل علي القلب
عايزين الحل السهل السريع
وعارفين انه مش موجود بس لسة بندور
ورقة وقلم …. مشكلتي اني…
ايه حلها؟!
اكتبه لو عارفه ودور عليه لو ماتعرفوش
نفذه
من غير نقاش كتير
ماتفكرش في التعب
ماتفكرش في المده
فكر في "النتيجة"
بس
غير طريقة تفكيرك
فكر بعقلك
انشف
دوس علي نفسك … هتكسب
منها ترويض للنفس ومنها جهاد ومنها زيادة ثقة في النفس
كوباية شاي بقي
بس انت كده تمام :-D


منتظرين تعليقاتكم ومشاركتكم ..