ابتعد عن كلام الناس

" غوستاف لوبون" -  طبيب ومؤرخ فرنسي مشهور -  .. بيقول فى كتابه المشهور برده "سيكولوجية الجماهير" :

" ان السهولة التي تنتشر فيها بعض الآراء وتصبح عامة تعود بشكل خاص إلى عجز معظم الناس عن تشكيل رأي خاص مستوحى من تجاربهم الشخصية  في المحاكمة والتعقل "

---
- " النص الفُلانى دة فى العربى مايتذاكرش أصلاً ! "

- " الفيزياء ! تاتاتااان .. البعبع يا جماعة ! .. دى تعمل حسابك فيها على خمس ست عشر درجات هتنزلهم !"

 - " لا يا عم ! الاحياء دى مش بتتذاكر .. دى بتتشال بس "
---

المشكلة دى بشكل رئيسي خاصة بالشخصيات اللى بتتأثر بكلام غيرها ، أو الشخصيات السماعية ..
فى بوست قبل كدة كنت اتكلّمت عن تأثير الكلمة .. وقد ايه مهما كانت بسيطة ممكن تبقى نتايجها – سواء ايجابية او سلبية – أكبر بكتير من المُتَوقَّع !! ( دة لينكه : https://goo.gl/1gt2rr )
نقدر نعتبر دة امتداد لفكرة تأثير الكلمة ..
المرة اللى فاتت اتكلّمنا عننا احنا شخصياً ، تصرُّفاتنا وكلامنا احنا مع غيرنا ، عن اننا مانكونش مصدر قلق و دوشة وطاقة سلبية ..
المرة دى بقى هنركّز على الطرف الآخر .. يعنى مصدر القلق دة موجود فى حياتى على شكل شخص بتعامل معاه ..

كــ طالبة كلية، بقول ان المشكلة دى ممتدة لكل مراحلك الدراسية الجاية .. ثانوية عامة هىَ بداية ظهورها بس .. تعامُلك معاها دلوقتى هيساعدك دلوقتى وبعدين كمان

والمشكلة - كما هوَ واضح - بتكون فى تأثير الكلام دة على حالتك النفسية و انت جاى تذاكر المادة الفُلانية دى .. حتى من غير ما تحس انت بتكون متأثر بانطباع مُسبق

لازم تعرف ان النهاردة انا بعرض المشكلة مش أكتر . انما الحل مُعتمد عليك انت بس بشكل كُلّى ..
أنا اخرى اوى أقولّك : ان فى الدراسة تحديداً مهما كان ناس كتير بيقولوا نفس الكلام على صعوبة أو سهولة مادة دة مش معناه ان كلامهم صح ..
يمكن هتحس بكلامى دة لما تلاقى نفسك شاطر فى مادة كل صُحابك بيشتكوا منها ، بس انت مثلا كنت بتحبها أو حليت فيها كتير ..
أو هتحس بيه لما تلاقى شخص من الموجة اللى بتهوِّل من الفيزيا .. ناقص فيها درجة فى الآخر !!

اخرى انى اقولّك تُحط سدادات فى ودنك وتسمح لنفسك تخوض التجربة كاملةً من غير تأثُّر بحد .. لأن الأصل فى البشر الاختلاف .. قُدراتك مش زيهم، اهتماماتك مش زيهم ..  و لو جرَّبت الحاجة بدون انطباع مسبق النتيجة قطعاً بتختلف !

ازاى تعمل كدة ؟ .. لسة قايلين ..
اجابة السؤال مُعتمدة عليك ..

---

وهختم بجملة لغوستاف لوبون من نفس الكتاب :
"الاشاعة أقوى من الحقيقة "

منتظرين تعليقاتكم ومشاركتكم معنا
وكالعادة .. غرناطة مكانكم الأول