مشكلة بطء المذاكرة وحلها..

هنناقش مع بعض مشكلة قومية ألا وهي: البطء في المذاكرة..
كتير مننا بطيء في المذاكرة، وبيقضي وقت كبير جدًا في مذاكرة درس واحد وده طبعًا ليه تأثير سلبي علينا..

أولًا، لازم تعرف إن دي مش مشكلة ولا شيء يستدعي القلق، كل شخص عنده قدرة استيعاب معينة، مش شرط صاحبي خلص الدرس في ساعة، أتضايق لو مخلصتش في نفس الوقت!

ثانيًا، خلينا متفقين ان اكتر حاجة بتسبب البطء هو "التشتت"، مينفعش أروح أذاكر ومعايا الموبايل مثلًا..

خُد مني الكام نصيحة دول..
- جيب note واكتب انت بتعمل ايه وقت مذاكرتك، اكتب كل دقيقة، اكيد هتلاقي وقت كبير بيضيع ف التفكير أو الحركة الكتير أو الفيسبوك أو... إلخ،  تدريجيا هتلاقي نفسك بتتلاشى الأخطاء دي ،لأن مش معقول هتسيب هدف حياتك عشان سرحان شوية فـ السقف.

- حدد وقت للمذاكرة، والأفضل يكون بعد الفجر  🌸

- ابعد كل حاجة ممكن تجذب انتباهك.

- اقعد في مكان فيه هواء ويا سلام لو تطلع على السطح.

- إنسى كل حاجة، ومتفكرش في أي مشكلة، وقت المذاكرة يعني مذاكرة وبس.

- جمع حاجات تحببك في المذاكرة على مكتبك زي الألوان و ورق شكله حلو، ودايماً خلي مكان مذاكرتك منظم..

- في البداية افتكر هدفك وشجع نفسك بكلام بسيط جدا وفرحة أهلك يوم النتيجة.
حدد وقت معين عشان تذاكر🕛 ، كأنك بتسابق مع الزمن، وحدد هدية تكافئ بيها نفسك، ده هيديك قوة تنجز.

- اقرأ الدرس قراءة سريعة، وحط عنوان لكل فقرة وبعدين ابدأ اقرأ كل جزء بهدوء.

- حاول تفهم كل جزء وتربط الأجزاء ببعضها.
*فكرة الربط هتخليك فاكر اللي انت قرأته دايما*

- ارسم واستخدم الألون📝..  ولما تراجع الدرس شوف الرسمة، انت ممكن تلخص عشر ورقات في رسمة..

هي رسمة بسيطة انت بس اللي تفهمها مش عاوزين رسمة لبيكاسو..

-وطبعًا حافظ علي علاقتك بربك.

الإمام الشافعي قال:

"شكوت إلى وكيع سوء حفظي.. فدلّني إلى ترك المعاصي

وقال إن العلم نور.. ونور الله لا يهدَى لعاصي" 

-----------------------

إن شاء الله بعد ماتنفذ الكلام البسيط ده هتلاقي استيعابك بقى عالي جدًا وبتخلص أسرع.. 

وحتى لو إنت لسه بطيء مش مشكلة.. الوقت مِلْكُك وأنت حر.. 

وخليك فاكر:

العلم يحلو كلما كررته.. ولهذا عُدتُ مكررا لحلاوته 

وبكثره التكرار يكثر نفعه.. فاذهب لتغنم من فوائد حكمته

في إنتظار تعليقاتكم، نسعى لمساعدتكم..