ازاى تحافظ على حماسك فى المذاكرة

عمرك حسيت انك مستمتع و انت بتذاكر و بتنجز .. انك مركز و نشيط و متحمس للى بتعمله ؟

• طب حسيت قبل كده  انك مش طايق المذاكرة و ان مهما ذاكرت مش هتنجح و حتى لو نجحت عمرك ما هتوصل لحاجة ف البلد دى و على ايه التعب ؟!

ما تقلقش انت مش لوحدك ده حال معظمنا .. لكن ازاى تخلى الإحساس الأول يسود على الإحساس التانى و لو حسيت بيأس و خنقة تخرج بسرعة من الإحساس ده و ترجع لحماستك؟  

" It’s all about you "

1- لازم تعرف ليه بتذاكر؟؟ ليه عايز تجيب مجموع حلو ؟؟ السبب ده لازم يكون حقيقى فعلا .. يعنى مش لازم تقول عشان افيد بلدى و أهلى و أنفع المجتمع .. لازم تكون صريح مع نفسك ممكن عشان ببساطة عايز أبقى حر فى اختيار الكلية و مبقاش متحدد بالمجموع .. عايز أكمل حياتى بشتغل ف المجال ده .. عشان أعيش ف مستوى اجتماعى أفضل .. عشان اتحدى نفسى ..

و هكذا .. المهم ان الهدف يكون حقيقى عشان فعلا يحفزك وقت اللزوم .

2- كل واحد بيتحمس بطريقة مختلفة .. شوف ايه الحاجات اللى بتحمسك تذاكر و كتر منها .. يعنى مثلا فيه اللى بيكتب هدفه بشكل حلو و يحطه قدامه دايما و هو بيذاكر أو ترسم صورة لشكلك المستقبلى اللى نفسك تكون عليه أو تقرأ مقالة زى دى.. تشوف فيلم أو فيديو  و ممكن  حاجات أبسط زى انك تشترى أقلام جديدة أو تشتغل على app جديد يحفزك تعمل to do list .. المهم اكتشف انت بتتحمس ازاى ؟

3- انك تحط تصور أو خطة لليوم تمشى عليها مش لازم يكون دقيق ف الوقت لكن ينظملك دماغك عشان متاخدش وقت كبير ف التفكير هتعمل ايه بعد كده

4- حط أهداف قريبة و كافىء نفسك لو انجزتها .. يعنى مثلا لو خلصت جدول انهارده هخرج مع اصحابى أو لو جبت ف امتحان العربى كذا هتفرج ع المسلسل الكورى ^_^

5- طيب فى ناس مش بتشتغل إلا لما تحس انها متحمسة .. الموضوع ده فى مقولة شهيرة

,losers work only when they are motivated"

"winners get things done anyway

حسيت قبل كده انك  مكسل عن الصلاة و أول ما تقوم تصلى تدخل فى خشوع و تتحمس تصلى أكتر و تحس بفرحة انك رضيت ربك و أديت صلواتك.. نفس الفكرة ف المذاكرة  حاول تشتغل على حسب خطة يومك حتى لو حماسك قلّ .. إحساسك بالمسئولية ان فى واجبات لازم تخلص أو حاجة لازم تتذاكر انهارده هو اللى هيدفعك تشتغل حتى لو مش مستمتع. نتيجة تعبك ده هتظهرلك ف تشجيع مدرسك ليك أو درجة حلوة جبتها ف درس أو إحساسك انك منافس مش سهل لزمايلك .. كل ده هيساعدك تستعيد حماستك تانى.. المهم keep working 💪💪