10 طرق لتستمع بوقتك أثناء المذاكرة

 استمع بوقتك أثناء المذاكرة

يمكنك أن تفعل كل شيء بالطريقة الصحيحة؛ تمتع نفسك، تخطط لوقتك بعناية، تتأكد من أن غرفتك تحظى بتهوية جيدة، كرسيّك مضبوط على وضع مناسب لظهرك، وتظل تشعر أنك تعد الأيام حتى انتهاء فترة الدراسة، أو حتى مغادرتك للكلية، أو –محتمل جدًا- حتى تتقاعد.

لذا؛ إليك التحدي، كيف يمكنك أن تجعل المذاكرة ليست فقط مقبولة ولكن ممتعة؟ هذه مهارة يتعلمها الطلاب عندما يذهبون للجامعة فقط ويبدأون بدراسة مادة يحبونها. بينما ما زلت تدرس موادًا أنت غير مهتم بها -وبعضها تتمنى ألا تدرسه مرة ثانية أبدًا- الاستمتاع بوقتك يكون بالرغم من دراستك وليس بسببها. يومًا ما قد تحب المواد التي تكرهها الآن لكن هذا ليس متوقع الحدوث عندما تذاكرها على عجل قبل الامتحانات.

هذه هي أفضل نصائح لإيجاد طرق للاستمتاع بينما تدرس أيًا كانت المادة.

1-استمع إلى موسيقى جميلة

دي نصيحة من الطراز الأول للمذاكرة، لسبب مهم هو إن كل حاجة بتبقى مرحة لما تعملها وأنت بتسمع مزيكا بتحبها. فيه ناس عندهم موهبة إنهم يركزوا وهما بيسمعوا أغاني كلماتها بتلخبط، بعضهم حتى ممكن يكتب مقال وهو بيغني. بس قبل ما تسرح وتغني أغنيتك اللي بتحبها لازم تتأكد الأول إنك من الناس دي. عشان ممكن تبدأ تكتب مقال عن هاملت وتلاقي نفسك بتغني لأديل. حتى لو مكنتش واخد بالك إنك بتتشتت في اختياراتك للموسيقى، أو بتعدي أغنية مزعجة بالنسبة لك أو تقعد سنين بتدور على قايمة الأغاني الصح؛ كل ده ممكن ياخد كتير من وقت مذاكرتك وأنت مش واخد بالك.

بس لو هتعرف تنفذ النصيحة دي صح هتفيدك جدًا. بالنسبة لمعظم الناس الموسيقى من غير كلمات هي اختيار أفضل. والموسيقي مش لازم معناها إنهم بيسمعوا موزارت لكن تراكات الأفلام مرحة ومشجعة وممكن تتخيل إنك في تدريب مونتاج وأنت بتذاكر. كمان تراك المزيكا الحلو رزق :D بينفع لسنين وكده هتقلل الوقت اللي محتاجه عشان تلاقي الاختيار الصح.

2- حول المذاكرة للعبة بالنسبة لك

الحاجات اللي بتساعد على المذاكرة زي البازل والألغاز  كلها بتؤكد حقيقة إننا عادة بنتعلم أحسن واحنا بنلعب، وبنكون محفزين أكتر كمان. عمرك جربت تجيب سكور عالي في لعبة الكلمات وأنت بتحل واجب لغات؟ ساعتها هتحس إن تفتيت المذاكرة لأهداف صغيرة تقدر تحققها وتقيسها ممتع أكتر.

نوع اللعبة اللي هتختارها بيعتمد على اهتماماتك والمادة اللي بتذاكرها، التاريخ مثلًا ينفع معاه سبورة كبيرة مليانة تفاصيل وكلام أكتر من الإحصاء مثلًا اللي هتحتاج تستخدم فيها المباديء اللي اتعلمتها في أحداث الحياة الحقيقية زي الالعاب الرياضية.

ممكن عملية اختيار اللعبة المناسبة ليك ياخد منك وقت أطول من إنك تلعب اللعبة نفسها بس كل ما هتتعلق بالمادة أكتر اللي هتحتاجه في مذاكرتها هيفضل له قيمته.

3-حول المذاكرة للعبة مع الآخرين

المذاكرة مع أصحابك ممكن تبقى زي حقل الألغام. ممكن تبقى مشجعة ومفيده عشان بتشاركوا أفكاركم اللي ممكن متفكروش فيها كل واحد لوحده. أو ممكن الموضوع ينتهي بيكم بتهزروا كتير ومش بتذاكروا حاجة في الحقيقة.

لو هتعرف تظبط الموضوع أو لو فيه صديق حازم في المجموعة بتاعتكم هيقدر يرجعكم للمذاكرة تاني، فتحويل المذاكرة للعبة مع أصحابك ممكن يبقى أحسن طريقة لمزج المذاكرة بالمتعة والحصول على الحد الأقصى من الأتنين.

"اخترع لعبة تلعبها مع اصحابك" ممكن تبقى أحسن وصفة لتضييع الوقت أكتر من اختراع لعبة لنفسك عشان كده اتأكد إن الموضوع يفضل بسيط.

الألغاز أو لعبة صيادي الكنوز ممكن نستبدلها بإنك تاخد دليل جديد كل ما تعرف إجابة سؤال.

4-استخدم أدوات شكلها حلو

هل أنت شخص بيحب الأدوات المدرسية؟ لو بتحبها أكيد هتبقى عارف؛ لو البحث في المكتبات أفضل عندك من التسوق في محلات مشهورة؛ لو متعة أغسطس بالنسبة لك هي شراء أدوات جديدة عشان الدراسة في سبتمبر؛ لو ممكن يبقى عندك أكتر من كراسة فاضيين عشان سايبهم تستخدمهم في مناسبات معينة لسة هتيجي أكتر من الكراسات اللي مكتوب فيها بس مش حلوة كفاية عشان تحتفظ بيها.

لو عندك مكتب مليان بأقلام جميلة، أقلام رصاص، ورق فاضي، كراسات، ستيكرز ويمكن أكتر من كده كمان، إذن يبقى ده الوقت عشان تستخدمهم كلهم.

اكتب بقلم حبر لو ده هيكون ممتع بالنسبة لك؛ بس دي مش فكرة كويسة إنك تكتب بيه في الامتحان؛ لكن فايدته إنه بيجبرك تكتب براحة وأنت بتاخد ملاحظاتك وده هيخلي المعلومات تثبت أكتر .

غطي الملاحظات بالاستيكرز لو ده هيشجعك تقرأهم أكتر. في الآخر يعني لو مش الأدوات الحلوة دي هتساعدنا في أوقات المذاكرة يبقى ليه نتعب نفسنا ونجيبها من الأول؟

5-جرب تمثل

لو بتذاكر  أي مادة فيها شخصيات وقصص زي التاريخ أو الأدب من الطرق اللي تساعد مخك مع العناوين الرئيسية هي التظاهر بإنك أحد الشخصيات وتمثل حياتهم لفترة. ايه اللي هنرى الثامن هياكله على الغدا؟ ايه اللي أوليفر تويست ممكن يعمله لو اتهدد عشان يسرق؟

ممكن لو فكرت شوية في الموضوع يبان سخيف بس ده بيختبر معلوماتك في المادة اللي بتذاكرها وبيخليها تثبت بطريقة ممكن الملاحظات العادية مش تساعدك فيها، ولو بتلعب مع حد من اصحابك ممكن تعملوا حوار مع الشخصية.
ممكن تكون مش بتستمتع بالنشاط ده جوه الفصل بس لو أنت عارف مهاراتك الشخصية هيبقى ممتع ومجزي أكتر، لما تبقى مش بتقول "أنا عاوز نوع الأكل ده عشان أنا الملك" لكن بتفكر في شخصية الملك وخلفيته الدينية اللي ممكن تأثر على اختياراته للأكل وقدر انفتاحه على تأثير الناس في قراراته.

6-ذاكر في مكان مختلف

المذاكرة عادة بتبقى مملة ببساطة عشان مش بتغير المنظر قدامك إلا لو بتعتبر خروجك من البيت للمكتبة تغيير. المذاكرة برة البيت في الصيف ممكن تبقى سلاح ذو حدين عشان ممكن تتعرض لضربة شمس أو حشرات ونمل يضايقوك بس لو قدرت تلاقي مكان فيه ظل في الحديقة ده ممكن يقلل الضغط بتاع المذاكرة وكمان يقلل من حسدك للناس اللي بيستمتعوا برة البيت.

لو مش هتقدر تخرج ممكن تغير مكانك في البيت، مش قصدنا طبعًا تجيب اللاب توب في البانيو بس ممكن تقرأ كتاب هناك عادي. بعض الناس بيتعلموا أحسن بالارتباط الشرطي يعني ممكن تحدد مجموعة مواد لغرف مختلفة وتتأكد إنك بتذاكر كل مادة في المكان المحدد ليها. ومتنساش إن النصيحة الذهبية للمذاكرة إنه مفيش حاجة سخيفة طول ما هي بتساعدك تذاكر.

7-اتحدى نفسك

وأنت بتذاكر  طبيعي تتحدى نفسك زي وأنت في الجيم، متحبطش نفسك بأهداف أكتر من اللي تقدر تحققه؛ وبدل كده امشي واحدة واحدة لكن بثبات مع استراحات منتظمة عشان تقدر تواكب على المدى الطويل. أكيد حاسس إن ده ممل مش كده؟

أنت عارف إن تحدي نفسك في مستوى صعب في الجيم شيء خطير عشان ممكن تعمل لنفسك إصابة مستديمة، بس عقلك مش هيتكسر عشان حاولت تعمل حاجة صعبة شوية.

لو أنت زهقان من إنك بتاخد نفس الملاحظات على نفس الأفكار عشان ده اللي لازم تذاكره فممكن تحفز نفسك بإنك تخليها تحدي.

هتلاقي ساعتها ازاي بتكتب مقال من صفحتين أو تحل مسألة رياضة في تلات ارباع الوقت المعتاد. متخليش التحدي مستحيل لكن إنك تخلي المذاكرة صعبة كفاية عشان تبقى محتاج تقحم مخك بقدر كويس هيساعدك في تقليل الملل.

8- اكتب كوميكس، قصص قصيرة أو أغاني

فيه عدد لانهائي من الأغاني اللي اتكتبت ممكن تكون مصممة مخصوص عشان تساعدك وأنت بتذاكر. إنك تعمل قافية للكلام أو تشغله مع مزيكا بيساعد بشكل كبير في تذكره، مش بس كنتيجة نهائية لكن أثناء ما بتألف القصيدة أو الأغنية في الأول.

لو الأغاني مش مناسبة بالنسبة لك، جرب نشاط مختلف زي رسم كوميك أو كتابة قصة. ممكن تعمل كوميك بيعبر عن حدث معين في التاريخ، أو ممكن تكتب قصة أساسها أحد مبادئ الفيزياء.

ضيف بعض التوريات واللعب بالكلمات في مصطلحات صعبة عشان تفتكرها أسهل وهتبقى اخترعت طريقة جديدة للمذاكرة بتستمتع بيها.

9- ادمج المذاكرة بالنشاطات التانية

لو برغم إنك جربت كل النصايح اللي فاتت بس لسة عندك مشاكل في إنك تذاكر باستمتاع، ممكن على الأقل تخصص وقت من يومك بتذاكر فيه بمتعة بس.
ممكن تحمل كام حلقة من المسلسل المفضل ليك عشان تقسم المتعة على مرات قليلة أو رتب مع صاحب ليك تتكلموا كل فترة على السريع عشان يتأكد إنك مش حاسس بملل شديد أثناء مذاكرتك.

التركيز مع المذاكرة ومحاولة إنك تبذل أقصى جهد عشان تخلي المادة ممتعة هو شيء صعب حتى لو بيحصل بطريقة طبيعية بالنسبة لك، عشان كده خليك فاكر تاخد استراحة عشان تنعش نفسك.

اكتشف إيه أفضل وقت استراحة بيفيدك، بعض الناس بيحبوا ياخدوا راحة نص ساعة بس لناس تانيين المذاكرة لفترة أطول وساعة كاملة استراحة هو الأفضل و دول عادة بيبقى عندهم مشكلة إنهم يرجعوا يركزوا في مذاكرتهم تاني بسهولة. شوف اللي يناسبك ومتعملش حاجة عشان بس نفعت مع اصحابك.

10- متتكسفش تبقى عبيط :D

فيه بعض المميزات للضغط الكبير وقت الامتحانات؛ واحدة منهم إنك مبتتكسفش تعمل اي حاجة عشان تذاكر. لو انت بتتمشى في البيت وبتغني أغاني عن الكيمياء أو وأنت بتتظاهر إنك هنرى الثامن أكيد طبعًا شكلك بيضحك عشان كده متخافش من الإحراج.

بشكل مطلق، لو إنك تكلم كرة شراب عن عقائد الديانات الرئيسية في العالم أو مش عاوز تاكل حاجة غير جبنة على الغدا هيساعدك إنك تذاكر فرنساوي اعمل كده وخلي المذاكرة ممتعة.

بقلم:مريم السنيطي