خد عقلك على قد عقله

"كل ما هو عظيم وملهم، صنعه إنسان عَمل بحرية" ألبرت أينشتاين

= أيوة بس أنا طالب ومبحبش المذاكرة، ومبعرفش أذاكر أساسًا وحاجة مُجبَر عليها، فإزاى هعمل بحرية؟!

- هقولك الأول إزاى تذاكر الحاجات الكتيرة قوى اللى وراك...فاكر جملة القنصل "صعوبتها في سهولتها"؟

جملة رائعة جدًا، بتعلمك إن أعظم الأشياء بتتحقق بأسهل الطرق والإمكانات، ركّز مع الطفل كده لو أنت حابب تأكله حتة لحمة، هتحطها له كلها في بُقه مرة واحدة كده؟ أكيد لأ، هنقطعها أجزاء صغيرة علشان يقدر ياكلها وكل ما يكبر الأجزاء الصغيرة دي هتكبر معاه .. طب نفهم من كده إيه؟

نفهم إنك لو عندك مذاكرة 200 صفحة مثلًا، مش هتقدر تذاكرهم كلهم مرة واحدة ولازم تجزئهم، بس خد بالك إن التَجزِيء مايكونش مُبالَغ فيه، يعنى متقسمهومش مثلاً كل 10 صفحات؛ لأن ده هيجيب نتيجة عكسية، وكل ما تخلص جزء هتلاقي عقلك -بشكل لا إرادي كده- مُتحمِس جدًا إنه يخلص الباقي..

من الآخر كده خد عقلك على قد عقله هيفرح بيك وهيبسطك وهيحبك وأنت كمان هتحبه ♥ :)

= طب ياعم طبطبنا ودلعنا وشخلعنا، هذاكر إزاى بحرية؟؟

- غاندي بيقول جملة حلوة قوي: "إذا تم رد الإساءة بالإساءة، فمتى تنتهي الإساءة ؟!"

= مش فاهم!

- ما هو أكيد مش فاهم، ما هو أنت لو فاهم مكنتش أنا اتنيلت كتبت المقال ده أساسًا :)

= طب قول ياعم الفيلسوف ..

- "إذا تم رد الإساءة بالإساءة، فمتى تنتهي الإساءة؟!" يعنى أنت تقعد تذاكر فعقلك يحلف إنه ما هيذاكر ولا هيركز في معلومة، تقوم أنت معاند معاه ومكشر وتقوله "هتذاكر يعنى هتذاكر" .. لأ مش أسلوب .. مش هتخلصوا من بعض كده

= طب أعمل إيه؟؟

- ياعم قلتلك خده على قد عقله، الطفل لو أنت عاوزه يعمل حاجة هو مش عاوز يعملها، الزعيق مش هيجيب معاه نتيجة، كله بالحب ♥ والمسايسة والحوافز والابتسام:)

يعنى ابتسم لعقلك -ابتسامة حقيقية فعلًا على وشك- وقوله معلش هنخلص الجزء ده بس وبعد كده هنقضيها شقلبظات أنا وأنت ..

= شقلبظات؟!!

- أيوة ياعم شقلبظات، فرفش كده يا ببلاوي .. المهم وخلي الابتسامة دي على وشك طول ما أنت بتذاكر، مش هتلاقي نفسك زهقت ولا متضايق من المذاكرة خالص ..

وكل معلومة تقرأها اسأل عنها دايمًا بـ "ليه ..؟؟"، هتوصل لمعلومة اسأل عنها هي كمان بـ "ليه ..؟؟"، وهكذا لحد ما توصل لكم معلومات يكونوا لك صورة كاملة في عقلك عن الشيء ده، هتلاقي الدنيا بقت سهلة وبسيطة، وعلى فكرة الكلام ده كله مثبت في علم النفس .. أنا مش بفتى:)

تقسيم الشغل والحافز والابتسامة والسؤال دايمًا بـ "ليه ..؟؟"، كلها حاجات كفيلة إنها تشعل الحماس في عقلك وتخليك ناجح في أى حاجة مش شرط المذاكرة بس ..

ونركز شوية على موضوع الابتسامة ده "الحب أوله ابتسامة" ابتسم لأى حاجة أنت مغصوب عليها بس في مصلحتك هتلاقي نفسك حبتها بعد كده :) وعقلك هيقيد نار علشان يعرف كل حاجة عنها، وده إثبات علمي لمقولة "الحب ولع فى الدرة". ولع النار في عقلك، خليه شايط من كتر الأسئلة والاستفسارات والخيالات وكل مشكلة تقابلك مش لازم تسأل حد على حلول ليها، دور أنت حواليك وتأمل في الطبيعة، الطبيعة بتقدملك أعظم الحلول وفقًا لمقولة القنصل "صعوبتها فى سهولتها"، زى ما تأملنا كده مع الطفل.

"يصدأ الحديد إذا لم يُستخدم ويركد الماء إذا لم يتحرك، وهذا هو ما يحدث للعقل دون أن يفكر"، ليوناردو دافنشي

خليك عظيم، وخد عقلك على قد عقله لحد ما يكبر وهو اللي يسندك..

"لا يجب أن تكون عظيمًا لتبدأ، لكن يجب أن تبدأ لتكون عظيمًا"..

خليك عظيم وخد عقلك على قد عقله .. :)

بقلم :مينا تادرس