حدد هدفك

عادةً ما نقابل أشخاص كتير في حياتنا بيكونوا مصدر إعجاب واستغراب برضه في نفس الوقت وتسأل نفسك سؤال منطقي: هو ازاي كدا؟!،

بالنسبة لي الشخص اللي دايمًا  يثير إعجابي هو الشخص اللي بيبقى محدد هدفه، وعارف هو عايز ايه وعارف هو عايز ايه من الهدف دا كمان مش مجرد محدد حاجه وبيقول أنا نفسي أوصل لها لا هو بيبقى عارف هو عايز ايه بعد الهدف دا كمان ونتيجته ايه وإيجابياته وسلبياته وكل حاجة، الموضوع بيبقى مثير للاهتمام فعلًا يعني ليه أنا كمان محددش هدفي وليه أنا كمان مبقاش عندي خطة وخطة بديلة وخطة بديلة للخطة البديلة، أنا ليه مش كدا؟

فكرت في مرة كدا أني اتغير وقولت أنا لازم اتغير خلاص وهحط لنفسي هدف وهامشي وراه وهحط خطة بديلة -وربنا يوفقني بقى إن شاء الله- في النظام الجديد اللي هيخليني راجل عظيم ومنظم و محط إعجاب الناس وكدا، طبعًا جبت ورق دوبلكس وعملت (TO DO LIST)  بالألوان والخط العريض وكتبت بقى كل حاجة بتمناها ونفسي فيها وعلقتها فوق مكتبي عشان كل ما أدخل الأوضة افتكر الموضوع باعتبار أن المكتب قصاد باب الأوضة مباشرة يعني، مش فاكر كنت داخل الأوضة ليه بعد 3 شهور تقريبًا بس فاكر أني كنت مكتئب شوية وببص كده قدامي لقيت اللوحة دي متربة وفاضية مفيهاش غير علامتين صح بس الأولى أني اسافر شرم الشيخ مع صحابي في الصيف والحمدلله حققتها يعني وتاني واحدة أني اغير الموبايل وبرضه دي أمي اتصرفت فيها يعني.

وبما أني كنت مكتئب وحزين وحقيقة دي أكتر اللي الواحد ممكن يقيم فيها نفسه ويصلح منها قررت أني ابدأ بجد المرة دي بس هل هعمل زي المرة اللي فاتت واخد الموضوع عافية ولا ممكن أسأل أو أقرأ عشان الدنيا تمشي بطريقة مظبوطة؟ قريت شوية واتفرجت على كام فيديو وسألت أكتر من شخص وعرفت الآتي..

أنت عشان تحط أهداف مناسبة ليك وتقدر تنفذها فعلًا وتبقى  إنجازك الخاص بيك لازم تتبع شوية خطوات عشان تحدد أهدافك و هي:

1- لازم يكون الهدف اللي أنت تحدده يكون له شوية مواصفات (محدد - قابل للقياس - سهل المنال نسبة لامكانياتك - له وقت محدد – يستاهل أنك تتعب عشانه)

2- تكتب الهدف دا وتكتب كل تطور حصل فيه وتكتب أنت عايزاه كهدف ليه؟ عايز توصل منه لايه والخطوة اللي بعديه ايه؟ عشان تبقى كل الأمور واضحة بالنسبة لك وتكون واضح وصادق مع نفسك.

3- لازم تقسم الهدف دا لعدة خطوات مرتبة ممكنة سريعة، وتواجه كل خطوة وكأنها هدف مستقل بحيث تقدر تتغلب على المشاكل اللي هتقابلك بسهولة وبالتدريج.

4- حاسب نفسك أول بأول عشان تضمن دايمًا أنك مركز في هدفك وعارف الخطوات اللي تخطيتها والخطوات المتبقية التقصير سببه أيه.

5- كافئ نفسك على كل خطوة وكل هدف تحققه عشان تقدر قيمة نجاحك وتلاقي دايمًا اللي يشجعك ويخليك تكمل في الهدف دا.

6- أخيرًا، دائمًا ما يكون النظام الجيد المنضبط والعادات السليمة طريق سليم وسريع لأي نجاح.

الإنسان من غير هدف ولا حاجة يسعى إليها ميفرقش كتير عن الحيوان بياكل ويشرب وينام -وحتى لو بيشتغل فهو يؤدي دور الظروف هي اللي خلته يؤديه، فكونك عايش من غير هدف دي حاجة تقلل من قيمتك وبتقل من تقدير الخالق ليك وازاي يبقى عندك مخ وعقل وتفكير وإمكانيات وناس بتشجعك وظروف مساعدة وحاجات كتير جدًا بس أنت مش بتستغلها لمجرد أنك مش لاقي هدف تسعى وراه؟ خليك صادق مع نفسك واعرف إمكانياتك كويس وحط الهدف اللي يناسب طموحاتك وأحلامك ويرضي غرورك وميقللش من قيمتك الطبيعية اللي أنت بأيدك تخليها أحسن.

وأختم المقال بكلمات أمير الشعراء من قصيدة سلوا قلبي:

"وما نيل المطالب بالتمني ::: ولكن تؤخذ الدنيا غُلابًا ..

وما استعصى علي قوم منال ::: إذ الاقدام كان لهم ركابًا "

بقلم:مصطفى الشهاوي