منحنى الطاقة .. ازاى تحافظ على حالة الصعود فى المذاكرة ؟

أحد اطروحات علم النفس بتشبّه عناصر حياة البنى آدم بـالـ"منحنيات"  .. و ان منحنى كل عنصر بيتجه صعوداً او هبوطاً على حسب حالتك ساعتها ، يعنى بيختلف من وقت لآخر ..

مثلاً حالتك المزاجية و النفسية .. لها منحنى بيطلع لفوق جداً لما تجيب الدرجة النهائية فى امتحان الأحياء ، أو و انتَ راجع بعد خروجة حلوة مع اصحابك هزرتوا و استمتعتوا فيها كتير ، أو لو كلتى شوكولاتة :D

و لو فى يوم مثلاً وراك مذاكرة ومش لاحق تخلّص ، أو مطبَّق وعايز تنام ، أو نزلت درجات كتير فى امتحان الكيميا و دة جابلك احباط شوية .. المنحنى ينزل لتحت

فى الوقت دة .. اللى هوَ لما المنحنى يكون تحت ، بتبقى فى قمة اللاتوازن و عدم الاستقرار النفسي و مش مستحمل حاجة و لا كلمة من حد .. و دة كل واحد بيترجمه على حسب شخصيته : يأما لعصبية و زعيق .. أو حتى انزواء و كآبة  و ممكن عياط .. أحياناً أكل كتير .. و غيره و غيره  

بُناءً على المثال اللى بنتكلِّم فيه  "منحنى الحالة النفسية" ، عايزين نطرح سؤال ..

هل ينفع فى الحالة التانية  اللى هىَ المنحنى بتاعك فيها تحت ، ييجى واحد صاحبك مثلاً عايز يحكيلك على مشكلة تساعده فيها ؟

هل ينفع أى حد يكلِّفك بحاجة تتطلب بذل جُهد نفسي ؟

الاجابة غالباً بتكون لأ ..

لأنك بتكون مش مستعد "نفسياً"

ماعندكش قدرة نفسية انك تساعد غيرك لأنك شايل هم نفسك

بعبارة اخرى : نفسيتك بتبقى مش على مستوى المشكلة دى ، او مش على مستوى الجهد النفسي دة ..

المفاجأة بقى .. ان الموضوع اللى جايين نتكلّم فيه النهاردة مش حالتك النفسية خالص :D

هنتكلِّم عن الطاقة  ..

بشكل ادق بقى : "منحنى الطاقة"

احنا فى شهر 3 ..

لا خلاف على اننا لازم نحافظ على هدوئنا وثباتنا ونحاول مانتوترش، ولكن مش معناه اننا نبقى أقل من الوضع اللى بنواجهه و لا ينفى ان قُدامنا أكبر تحدى فى السنة ..

و دة شىء لازم ندركه كويس  .. ليه؟

عشان ماينفعش تكون فى قلب تحدي زى دة و يكون منحنى الطاقة بتاعك تحت !

ماينفعش يبقى قُدامك فرصة كبيرة زى دى و ماتكونش طاقتك على مستوى الحدث !

الفرق بين دة و بين المثال اللى قولناه فى الأول ان صاحبك ممكن يرجع يحكيلك المشكلة لما نفسيتك تتحسِّن و تكون قادر ترد عليه وتتفاعل معاه

لكن الوقت مش بيرجع !

مش هيستنى لما طاقتك تِعلى وحماسك يزيد عشان يرجعلك ..  

وعليه .. لو منحنى طاقتك عالى اليومين دول ، نحب نقولك انك على الطريق الصح .. و يا ريت تحافظ عليه كدة لغاية آخر السنة ..

لو المنحنى فى النازل .. فـ انتَ عندك مشكلة محتاج تسلَّط الضوء عليها وتلاقيلها حل

اعمل جدول .. وكل ما هتنجز فيه هتحسّ براحة و حماسك هيزيد  

خُد فترات راحة بعد مذاكرة جوء كبير كمكافأة لنفسك  ( بس ماتطوّلش ها ) ..

اقرا شوية قرآن حتى لو صفحة واحدة .. أو اسمعه

جرَّب تذاكر فى مجموعة .. بيساعد مع ناس كتير

لو بتاخد درسين فى مادة و شايف ان ممكن تستغنى عن واحد فيهم اعمل دة بلا تردد .. هيوفّرلك وقت زيادة للمذاكرة ( بشرط تُحسن استغلال الوقت دة وتنظّمه)

كُل شوكولاتة :D .. اعمل اى حاجة بتبسطك و حددلها وقت فى حدود المعقول  اللى ينعش دماغك وفى نفس الوقت مايعطّلش

خليك فاكر ان المنحنى لازم يفضل فوق .. و دائماً فوق

و لو مش فوق لازم تطلَّعه ..

الفترة دى ماتتعوَضش .  

شاركنا هدفك فى كومنت و قولنا ايه التحدي بالنسبالك الفترة الجاية