مزنوق فى الوقت و مش عارف اذاكر ولا اراجع.. الحل !

مزنوق 
طب ما تيجوا نبدأ في الشغل العملي شوية  :-D
نظريا فات وقت كتير وباقي وقت قليل لكن عمليا الوقت اللي فاضل ده هو اللي فيه الشغل كله وهو اللي بيفرق بجد وكفيل انه ينقلك من كلية لكلية
هنفترض انك خلاص بدأت مراجعات وانك ميح خالص وهنبدأ من الاول 
ورقة وقلم كدة حضرتك واكتب دروس المنهج كله كل مادة عمود محترم واكتب الدروس فوق بعض
وورقة تانية او نتيجة عبارة عن count down  لحد اول يوم امتحان
انت ايه خطتك او نيتك ؟ 
انك تخلص المنهج مراجعة سريعة علي الشرح مرة مثلا وتعمل حسابك في وقت كافي تحل فيه علي فروع المنهج كله اكتر من مرة وطبعا امتحانات سابقة 
معانا اد ايه؟ 
حوالي 3 شهور
حلو
خلينا متفقين ان لو مثلا قسمت اول شهر او شهر ونص مراجعة وااشهر ونص الفاضلين حل هتنسي اللي انت راجعت عليه
اذا الحل الامثل حاليا انك تراجع وبعدها مباشرة تحل
بلاش تفصل كل مادة عن التانية يعني مش تحدد الأسبوع ده فيزيا بس واللي بعده عربي بس عشان علي ما توصل لاخر مادة هتكون نسيت الاولي
حدد في اليوم الواحد تقدر تستوعب كام مادة
بلاش اكتر من 3 مواد
لو مادة واحدة قسم مذاكرتك انك تراجع كم معين من الدروس وتحل عليها في نفس اليوم
مدة الحل تكون اطول شوية من المراجعة لأن الحل فعال اكتر في الاستيعاب
لما تحل وتحس انك ناسي حاجة ارجعلها افهم الجزئية دي بس وكمل حل وهكذا لكن مش تراجع الفصل كله كدة انت بتضيع وقت 
لما تخلص مادة معينة اوعي تركنها وتشتغل في الباقي 
خليك محافظ علي تعبك فيها وزورها نص ساعة ساعة كل يوم 
اكرم المادة تكرمك ;-)
خليك غيور علي وقتك
ماتسيبش دقيقة تضيع منك بلا استفادة كدة
خليك دايما لابس ساعة في ايدك وراقب وقتك كويس 
الحاجة اللي بتعطلك ارميها جنب اقرب حيط مهما كانت أهميتها عندك
نام كويس وكل كويس 
خليك في اوضتك اغلب وقتك ماتخرجش غير للضرورة القصوى 
ماتحتكش بالناس كتير وماتخافش ليك عذرك وهيقدَّروا
صلي صلي صلي ادعي ادعي ادعي ماتبخلش  دي اهم نصيحة
تاني اهم نصيحة … اوعي تقول الوقت فات وعدي خلاص  "العبرة بالخواتيم" 
حط الكلمة دي في دماغك دايما  خليها  ترن في ودانك  علي طول كل ما تحس بإحباط اوعي تسيب نفسك لتفكيرك وانك خلاص كدة ماتعرفش ايه اللي ممكن يحصل لعل الله يحدث بعد ذلك أمرا 
اخيرا وليس اخرا تعامل مع نفسك كآلة … كمبيوتر 
الغي كلمة مش هقدر 
الغي كلمة مكسل
اصلي مش هقدر اصحي بدري
اصلي مش هستوعب ده كله
هاخد النهاردة اجازة بقي
خليك اد كلمتك 
طول مانت بايدك الاختيار اختار الصح واللي يرتاحله ضميرك
اقوم اذاكر ولا اكمل نوم ؟
لا ذاكر يا حبيبي ذاكر ياما نمت وياما هتنام النوم مش هيطير المذاكرة هي اللي هتطير :-D
الجزء التاني هنتكلم فيه عن المواد نفسها وخاصة اللغات بإذن الله 

شاركنا طموحك وهدفك فى كومنت و قولنا التحدي بالنسبالك