عقدة المدرس المشهور .. الأسطورة .. خليك مختلف

معلومة مهمة جدااا احتمال كبير تكون غايبة عنك
عارف لو بصيت لصوابع ايدك
مش هتلاقيهم زي بعض !!!
تا تاااااااا :D
عارف المعلومة دي ؟!
غريبة :/
ليه مش بتنط في دماغك اول ما تلاقي انك مش فاهم من نفس المدرس اللي دحيح الدفعة بيفهم منه ؟
ليه بتجبر نفسك تحضر مع اسطورة الكيمياء وانت مش فاهم منه لمجرد ان اعداد طلبته كبيرة ؟
ليه بتجبر نفسك تذاكر بنفس طريقة صاحبك اللي ذاكر بيها ونفعت معاه ومش نافعة معاك ؟
ليه سايب معظم المنهج لقبل الامتحانات وانت بتخدع نفسك انك هتلم في الاخر لمجرد ان معظم "الفاشلين" قالوا كدة ؟
اتأثرت بيهم لمجرد انهم شريحة مش قليلة من الطلبة اللي في دفعتك ؟
انت فين من دول ؟
ليه عملت من نفسك مسخ مصنوع من حتة من ده علي حتة من دي ؟
ليه مغطي شخصيتك الحقيقية اللي مرافقاك من ساعة ما اتولدت ؟
خايف تخذلك او ماتوصلكش لهدفك ؟ 
ماتخافش … ربنا خلق كل واحد فينا مختلف عن غيره تماما 
خلق لكل واحد الشخصية اللي تناسبه اللي مش هتنفع حد غيره 
يمكن تسمع من حد طريقة معينة للمذاكرة وعجبتك وجايبة معاك … كمل فيها
يمكن تسمع عن مدرس شرحه احسن من واحد تاني عاجبك بردو … كمل 
عارف … كان من اكبر مشاكلي في الثانوية العامة … الكيميا والفيزيا … حرفيا ماكنش عندي مشكلة في اي مادة غيرهم
الكيميا مش لاقية مدرس افهم منه فيها والفيزيا المدرس اللي كنت بحضر عنده مش فاهمة منه بس مكملة لان معظم زمايلي اللي بيحضروا عنده بيفهموا منه جدااااا ومشهور اوي واعداده كبيرة ما شاء الله
اقنعت نفسي بكل الطرق ان هو ده مفيش غيره 
قربت الامتحانات ولسة مش فاهمة معظم المنهج واقنعت نفسي تاني ان اكيد المراجعات هتفهمني واكيد مختلفة 
وجت المراجعات احبطت احباط اكتر بكتير من المتوقع لان كل الطلبة فاهمين وسابقينه في الشرح الا انا ! 
ودخلت الامتحان ببركة دعا الوالدين وستر ربنا اني عديت 
اما بالنسبة للكيميا حضرت مع احسن الوحشين اللي بردو صحابي بيحضروا معاه وبردو عديت باعجوبة
عارف النتيجة كانت ايه ؟
كانت ان حوالي 13% من ال 20% اللي ناقصاهم كيميا ووفيزيا فقط لا غير … بسبب غباء وقلة ثقة في نفسي مش اكتر
وربنا دي كانت النتيجة فعلا للاسف :/
عشان كدة اتعلم واوعي تقنع نفسك انك غلط والباقي صح
اوعي تشك في قدراتك بسبب ثقتك الزايدة في صاحبك وفي رأيه
انت ليك دماغك اللي هتريحك بشكل او باخر وهتقدملك حل مشكلتك اسرع واكفأ بكتير من اي حل هتاخده من حد غيرك 
كل واحد دماغه مريحاه … بس اسمعلها واديها فرصتها
اوعي تعيش في وهم انك فاشل عشان بتحضر درس في بيت وسايب مدرسين السناتر الكبيرة
اوعي تقنع نفسك ان المدرس ده مش هيوصلك للدرجة اللي بتحلم بيها في المادة دي … الاساس انت
اوعي تسعي لانك تكون نجمة وسط نجوم كتييييربتنور في السما
اسعي انك تكون زي ما انت … مختلف … دماغك مريحاك
اسعي لانك تكون قمر
قمر وسط النجوم


شاركنا بتعليقك ومتنساش تعمل #شير لصحابك