يعني ايه تفاضل ؟؟

كتير مننا ميعرفش ايه هو أصلاً علم التفاضل .فى موضوعنا ان شاء الله هنعرف مع بعض إيه هو علم التفاضل ^_^ 

اولاً خلينـا متفقين ان التفاضل فرع من فروع الرياضيات

التفاضل ده بيهتم بالداله آوى .. ازاى بقى ؟!

يعني بيهتم بدراسة سلوكـ الداله و التغير الى بيحصل فيها

و بيحل المشاكل الى الجبر مقدرش يحلها بسهوله

عشان كده ديما بندرس التفاضل بعد ما بناخد اساسيات الجبر و الهندسه و حساب المثلثات و كمان بندرس فيه النهايات و الاشتقاق و بنحسب بيه ميل المنحنى و معدل تغير الكميه

سؤال بقى مين هو مؤسس علم التفاضل ؟ و أمتى أسسه ؟!

الاول حصل اختلاف كبير بين نيوتن و العالم الألمانى لابنتيز فى اولوية اكتشاف علم التفاضل . لأن نيوتن منشرش دراسته بشكل مبكر هو كان وضع علم التفاضل و التكامل ما بين (1665 و 1667 ) لكن نشره فى عام 1704 و بسبب تأخره العلماء اختلفوا يعتبروه مؤسس العلم ولا لا  . بس اغلب العلماء و المؤرخين  انحازوا لنيوتن لان هو اول واحد توصل للصيغة المعتمده من العلم ده بس برضو لازم نعرف ان اسهام نيوتن و لايبنتز كان امتداد لاعمال باروو و ديكارت و دى فيرما و هايغنس و والس و فى برضو عالم رياضيات يابانى اسمه كوا سيكى

السؤال دلوقتى هل كان فى دور للعلماء المسلمين ؟

طبعا كان ليهم دور فى التمهيد للعلم ده و منهم ابن الهيثم و ثابت بن قرة

ديما التفاضل مرتبط بالتكامل يا ترى انهى ظهر الاول ؟

كتير مننا بيفتكر ان التفاضل ظهر قبل التكامل و لكن الصح هو آن التكامل ظهر الاول ثم التفاضل

آكيد آحنا مش بندرس العلم ده من فراغ ده مهم جداً لحيـآتنا على سبيل المثال علم التفاضل و التكامل مكن العلماء من انهم يعرفوا القوانين اللى بتتحكم فى حركة الاجرام السماويه و القوانين الى بتبين ازاى النجوم و الكواكب تشكلت و نشأت .

و كمان اى شئ متعلق بالحركه او بالكميات المتغيره و تحديد معدل تغير الكمية و بيستخدم لحساب ميل المماس للمنحنى و كمان التغير فى السرعة الطلقه بيكون عن طريق علم التفاضل .

و ايضا فى الطب ممكن نستخدم التفاضل و التكامل عشان نجيب زاوية التفرع المثالية لوعاء دموى عشان يزداد التدفق .و فى استخدامات اكتر بكتير دى مجرد نبذه عن استخداماته .