البروتين القاتل .. و كسل المذاكرة

هوَ النهاردة كام ؟؟
فى شهر ايه احنا دلوقتى ؟؟
لو اجابتك – عزيزي الطالب -  بتقع فى الفترة الزمنية اللى بين شهر 11 و شهر 2 .. يبقى تعالى هنا بسرعة، عشان فيه كلمتين مهمين من واقع خبرة اللى سبقوك  

سمعت قبل كدة عن مصطلح "الروتين القاتل" ؟ ..
فيه بعض الأوقات اللى مابتبقاش عارف تحُطلّها تصنيف عندك فى سجلّ  المشاعر .. يعنى مالهاش جمال البدايات والحماس اللى بيكون فى الأول  .. ولا ليها الدربكة و الانجاز و الضغط اللى بيكون فى الآخر ! حاجة فى النُص مالهاش محل من الاعراب، كأنك ماشى بالقصور الذاتى .. ماشى لمجرد انك "لازم" تمشى .. ماشى بالروتيـن

  اهى الفترة الزمنية اللى بنتكلّم عليها دى أكتر فترة بتكون عرضة يحصلّك فيها كدة .. والموضوع دة حَرِج جداً على فكرة، مش حاجة تمر علينا مرور الكرام ..
الفترة دى مهمة جداً ليك كطالب ثانوى .. مش عايزة أقولّك انها اهم حتى من آخر السنة !

الفترة دى أهم فترة للانجاز بعيداً عن الضغط و الوقت الضيق اللى بيكون فى الآخر .. فترة مابتتعوضتش تانى

انتَ لو ماكنتش بتذاكر المدة اللى فاتت كلها ورا المُدرسين .. فَـ دى فُرصتك تِلم اللى فات، زنقة آخر السنة وحشة جداً

لو فيه حاجات وقعت منك فى النص وعديتها بسبب ضيق الوقت او غيره .. فُرصتك تكمّل اللى ناقصك عشان آخر السنة يكون مراجعة بس


جايز الروتين بيظلم الفترة دى وبيخلّى عندنا حالة من الفتور و الاطمئنان المبالغ فيه انه احنا لسة مش فى آخر السنة ومعانا وقت كتير و كدة .. و هوَ دة أساس الغلط كله و أساس العك فى الآخر .. وهنرجع نتمنى لو كُنّا استغليناها صح
بس انت عرفت من الأول  .. يبقى دُق جرس الانذار فى دماغك وماتسمحش لحاجة زى دى تعدّى من تحت ايديك ^^

----

فيه مشكلة تانية بتواجهنا كمان  - ولسة بنتكلّم فى نفس الفترة الزمنية برده - ..
“آنا اليانور روزفلت" - السياسية الأمريكية الناجحة، و اللى كانت سيدة امريكا الأولى-  .. كان ليها مقولة مشهورة ومهمة جداً بتقول : " التمنى يستهلك نفس الطاقة التى يستهلكها التخطيط"

المشكلة اللى عايزة اتكلّم عليها هنا يا جماعة هىَ" احلام اليقظة " المُبالغ فيها :3 ..
ممكن ماتشغلش بالك بموضوع الكلية خالص دلوقتى ؟
ركّز فى حاجة واحدة بس حالياً : وهىَ انك تطلّع اقصى مجهودك  و ماتطنّش اى حاجة ممكن تقدر تعملها .. كل اللى مطلوب تعمل اللى عليك وماتنشغلش بالنتايج ابداً دلوفتى  

كل حاجة فى وقتها أحلى .. اه  الطموح شىء كويس وبيدّى دفعة معنوية كبيرة، مش بقول مايكونش عندك طموح ..
 بس كل اللى بقوله انك ماتخلّيش الموضوع يشغل مساحة كبيرة اوى من تفكيرك لدرجة انه ياخد من وقت كان المفروض تستغله فى الشُغل !
خلّى ذهنك دلوقتى متركّز على انجاز اكبر قدر ممكن وعلى المجهود اللى بتبذله  وبس .. وتحط فى دماغك "ان الله لا يضيع اجر من أحسن عملا"، والنتيجة هتبقى احلى من 100 حلم يقظة اتخيّلته فى يوم :))  

شاركنا طموحك وأهدافك فى #كومنت ومتنساش تعمل #شير وفيد غيرك