اللمبة

خليك اللمبة لطريقك

اللمبة..

اشمعني اللمبة؟ ليه اللمبة؟ تقصدي أيه باللمبة؟

• في الأول كده عمرك لحظت أن الثقة بالنفس "الاستحقاق" عامل بالظبط زي اللمبة؟ 

ـ بمعني أن اللمبة لما بتشتغل بتنور لك المكان اللي أنت قاعد فيه فبتساعدك أنك تقوم بالمهام بتاعتك كاملة، ولو النور قطع و أنت معاك كشاف يقدر ينورلك طريقك وتهتدي للمكان اللي أنت عاوزه بدون أي تخبط او مشاكل .. طب ما ده تقريبًا اللى بتعمله الثقة بالنفس في صاحبها، يعني صعب تلاقي إنسان عنده ثقة بنفسه وماشي تايه مش عارف يروح فين ويجي منين.

• ياه ليه يعني؟ 

- أقولك ببساطة أن الانسان اللي مدرك أن ربنا خلقه لتعمير الأرض، وأنه خليفة الله على الأرض، وأنه لم يُخلق عبثًا، ولوجوده مغزى وهدف سامي طبيعي هيحس بقيمة نفسه ويقدرها ومن هنا يبدأ يثق في نفسه ويقول انا فين وعاوز أروح فين والطريق ده أروحله ازاي؟ 

ويستعين بالله، ويتوكل علي الله، ويبدأ رحلته لتحقيق هدفه وهو واثق في الله اولًا ثم نفسه ثانيًا.

• وبيوصل بقا علي كده؟ 

بنسبة كبيرة اه بيوصل.. والنسبة التانية مش بتوصل ليه؟ 

عشان بتكون ثقته مزيفة مش حقيقة يعني يقول:

ـ آه، أنا واثق في نفسي وهوصل قدام الناس، لكن بينه وبين نفسه عارف أن الصعاب كتير، وهو ميقدرش عليها فهتلاقيه وقع..

ـ وفي اللي ثقته بنفسه متوسطة، وده تلاقيه يمشي شويه لقدام ولما يلاقي الناس حواليه بيحبطوه بيحاول يكمل بشوية الثقه الي عنده، بس بعد وقت بسيط برضوا بيقع..

ـ وفي بقا صاحبنا التالت اللي شاحن نفسه ثقه بالنفس عالية، ثقه ملموسة، حقيقة تقف قدام العقبات وإحباط الناس وتكمل للنهاية..

•طيب أنا معنديش ثقة بنفسي! كده أنا ضعت خلاص؟!

أكيد لأ.. مفيش حاجة اسمها ضعت،  لكن استعن بالله، ابدأ، حاول، عافر، كمّل فتوصل -إن شاء الله- غير كده مافيش..

من حسن حظنا احنا كـ "بشر" عندنا "عقلنا الباطن" وده عامل بالظبط زي الصلصال تقّدر تشكله زي ما أنت عاوز، والأحلى أنه بيستجيب ليك يعني زي ما اترسخ فيه الجمل الشهيره " انا فاشل ومش نافع "، " الي ذاكر ذاكر من زمان "، " الوقت ضيق ومش هلحق أخلص "، " يعني انا اللي هقدر ! " كل ده تقّدر تمسحه بأستيكة، وتدّخل مكانه كلام صح يفيدك وينفعك  ويوصلك لهدفك؛ لأن ببساطة كل المعتقدات اللي اترسخت دى هى فى الحقيقة مش أنت مش شخصك، هي الكلام اللي اتعودت تسمعه من اللي حواليك.

⬅ كل ما عليك دلوقتي أنك تخلص عقلك الباطن من كل الرسائل السلبية اللي وصلتله، وماتسمعش لأي حد بيحاول يقلل من ثقتك في نفسك ومن قدراتك ...

• دلوقتي بقا ورقة وقلم، واكتب معايا وردد اللي بتكتبه بصوت مسموع و آمن بيه.. يلا..

ـ أنا ناجح.

ـ أنا متفوق.

ـ أنا متميز.

ـ أنا مجتهد , منظم و ذكي.

ـ أنا اقدر أوصل لحلمي.

ـ أنا مؤمن بقدراتي.

ـ قمم الجبال اتخلقت عشان أوصلها.

ـ انا واثق بنفسي وأستحق النجاح.

ـ ممكن أوصل لأي حاجة أريدها اذا اشتغلت بجد وكفاءة عالية للحصول عليها.

ـ أنا متقبل نفسي وبحبها.

ـ أنا هحقق حلمي و أجيب المجموع اللي نفسي فيه وكذلك الكليه اللي بحلم بيها.

•ياتري أيه أكتر حاجة بتقع عليها عينك؟

ـ مُفكرة، كتاب، كشكول، موبايل، الحيطة في غرفتك..

ـ اكتب على ورقة وعلقها علي الحيطة، اكتب الجمل اللي فوق واحفظها كويس ورددها كتير..

ـ كل ما تسرح أسرح في حلمك، وتخيل نفسك لمدة 10 دقائق، وحس بشعور النجاح الشعور ده هو أكبر مُحفز ليك و هيزود ثقتك بنفسك ويخليك تقدر تكمل للنهاية..

ـ اعمل تسجيل صوتي لنفسك وأنت بتقول الجمل دي ومؤمن بيها متسعمش غيرها و بالتدريج عقلك الباطن مع الاستمرار والتكرار هيصدقهم هيأمن بيهم جدًا وهيترسخوا جواك، رددهم واتصرف بيهم بمعني اتصرف كإنسان ناجح ومنظم للوقت وبيستغل وقته صح، اتصرف كإنسان مجتهد، وواثق أنه يقدر يوصل مع التكرار والإيمان بإذن الله هتوصل.

•يجب أن تثق بنفسك و إذا لم تثق بنفسك فمن ذا الذي سيثق بك؟

**ملحوظة: الطرق دي مُجربة قبل كده وأصحابها بالفعل وصلوا لأهدافهم يعني مش مجرد كلام نظري..

والله الموفق والمستعان..